Кеше Франция пайтахты Париж қаласында 28-август күни басланған XVII жазғы Паралимпиада ойынлары өз жуўмағына жетти.
Бул абырайлы жарыста жер шарының 182 мәмлекетинен 4400 аслам параатлетлер 549 медальлар комплекти ушын өз-ара беллесиўлер алып барды ҳәм Өзбекстан паралимпиада сайланды командасы да табыслы қатнасып, тарийхый нәтийжени қолға киргизди.
Атап айтқанда, Өзбекстан сайланды командасы 10 алтын, 9 гүмис ҳәм 7 қола медальларын жеңип алып, улыўма командалық есапта 13-орынды ийелеўге миясар болды.
Дыққатқа ылайық тәрепи сонда, буннан сәл алдын Париж Олимпиадасында да мәмлекетимиз спортшылары 13-орынды ийелеген еди. Елимиз параатлетлери Азия еллери арасында Қытай ҳәм Япониядан соң үшинши, Ғәрезсиз мәмлекетлердиң дослық аўқамы мәмлекетлери арасында Украинадан кейин екинши, Түркий ҳәм мусылман мәмлекетлери арасында биринши орынды ийеледи.
Улыўма командалық есапта медальлар саны бойынша Қытай Халық Республикасы 94 алтын, 76 гүмис ҳәм 50 қола медалы менен биринши орынды ийелеген болса, 2-3-орынлар Уллы Британия ҳәм АҚШлы паралимпиадашыларға несип етти.
Келеси Паралимпиада ойынлары 2028-жылы АҚШтың Лос-Анжелес қаласында болып өтеди.
Адилбай Оразов,
Қарақалпақстан хабар агентлиги шолыўшысы