Францияның Париж қаласында жазғы Паралимпиада ойынлары даўам етпекте.
5-сентябрь күни өткерилген жарыслар жуўмағында Өзбекстан спорт делегациясы ағзалары 2 алтын медальды қолға киргизиўге еристи. Атап айтқанда, ең дәслеп пара дзюдошы Шерзод Намозов грузиялы қарсыласын жеңип алтын медаль ийесине айланған болса, соңынан пара жеңил атлетикашы Хусниддин Норбеков ядро ылақтырыўда және бир мәрте теңсиз деп табылып, үшинши мәрте Паралимпиада ойынларының чемпионы атағына миясар болды.
Кешеги күнги жарыслар жуўмағынан соң улыўма командалық есапта Қытай 73 алтын, 55 гүмис ҳәм 37 қола медалы менен биринши орында киятыр. Ал, 2-орынды 36 алтын, 28 гүмис, 19 қола медалы менен Уллы Британия ийелеп тур.
Мәмлекетимиз спорт делегациясы болса, 8 алтын, 5 гүмис ҳәм 4 қола медалы менен 12-орынды ийелеп келмекте.
Адилбай Оразов,
Қарақалпақстан хабар агентлиги шолыўшысы