Франция пайтахты Париж қаласында XVII жазғы Паралимпиада ойынларының салтанатлы ашылыў мәресими шөлкемлестирилди.
Бул ретки Паралимпиада ойынларының ашылыў мәресиминде Олимпиада ойынлары сыяқлы биринши мәрте стадионнан тысқарыда өткерилди.
Париждеги Елисей майданы бойлап Конкорд майданына шекемги аралықта қатнасыўшы мәмлекетлердиң байрақлары 65 мыңға шамалас тамашагөйлердиң қол шапатлаўлары астында алып өтилди.
Өзине тән театрластырылған ашылыў салтанатларында Франция мода тарийхы, Паралимпиада ойынларының келип шығыўы ҳаққындағы видеоролик көрсетилгенинен кейин, 2024-жылғы Олимпиада ҳәм Паралимпиада ойынлары шөлкемлестириў комитетиниң басшысы Тони Эстангке ҳәм Халықаралық Паралимпиада комитети (ХПК) президенти Эндрю Парсонстиң қатнасыўшыларға жоллаған қутлықлаўынан соң Франция президенти Эммануэль Макрон жазғы Паралимпиада ойынларын ашық деп жәриялады.
Кең майдан сахнасына Паралимпиада байрағын биринши майып астронавт паралимпиадашы Жон Макфолл алып шықты.
Конкорд майданында шөлкемлестирилген мәресимде жигерли паралимпиадашыларымыз Ҳусниддин Норбеков ҳәм Моҳигул Ҳамдамова Өзбекстан байрағын бәлент көтерген ҳалда майданнан алып өтти.
Салтанатлы мәресимде Азия паралимпиада комитети вице-президенти, Өзбекстан Миллий паралимпиада комитети баслығы Мухтархан Тошхўжаев қатнасты.
2024-жылғы Паралимпиада ойынларында 4400 пара спортшы 20 спорт түри бойынша гүрес алып барады. Он бир күнлик жарыслар даўамында ерк-ықрар ийеси болған пара спортшылар Паралимпиада ойынларының 549 медальлар жыйындысы ушын гүрес алып барады. 2024-жылға Олимпиада ойынларында болғаны сыяқлы, 2024-жылғы Паралимпиада ойынларында да гендер теңлик сақлап қалынды.
Т.РЎЗИЕВ,
Ж.ТОШХЎЖАЕВ,
ӨзАның хабаршысы