Усы жыл 26-август күни Бердақ атындағы Қарақалпақ мәмлекетлик университетиниң академик Ч.Абдиров атындағы мәденият сарайында Өзбекстан Республикасы Олий Мажлиси Нызамшылық палатасына ҳәм жергиликли Кеңеслерге депутатларды сайлаў бойынша Округлик сайлаў коммисиясының баслығы, орынбасары ҳәм хаткерлери ушын сайлаўға таярлық көриў ҳәм оны өткериўге байланыслы оқыў-әмелий семинардың дәслепки күни басланды.
Семинар басланыў алдынан Округлик сайлаў коммисиясының баслығы, орынбасары ҳәм хаткерлери менен Қарақалпақстан Республикасы Министрлер Кеңеси Баслығының орынбасары Б.Өтемуратов, Қарақалпақстан Республикасы Орайлық сайлаў комиссиясының ағзасы М.Утепбергенов ушырасыў өткерди.
Ушырасыўды университеттиң Илимий ислер ҳәм инновациялар бойынша проректоры И.Турдымамбетов алып барды.
Дәслеп ушырасыўда сөзге шыққанлар быйылғы сайлаў процесиндеги өзгешеликлер, нызамшылыққа киргизилген өзгерислер ҳаққында толық ҳәм анық мағлыўматлар берип, семинар қатнасыўшыларын усы еки күнлик семинарда өз билимлерин жетилистирип, белсенди болыўға шақырды. Буннан соң, семинар арнаўлы оқыў ханаларда өз жумысын даўам еттирди.
Қарақалпақстан хабар агентлиги