Қарақалпақстан Республикасы өсимликлер карантини мәмлекетлик инспекциясы ҳәм өсимликлер карантини илим-изертлеў орайының Нөкис аймақлық филиалы тәрепинен «Хожели агросанаат орайы» ЖШЖға қараслы ыссыханада көргизбели семинар өткерилди.
Илажда өсимликлер карантини инспекциясының жетекши агрономлары тәрепинен Өзбекстан Республикасы МинистрлерКабинетиниң 2021-жыл 22-январдағы «Өсимликлер карантини тараўында мониторинг жүргизиў ҳәм фитосанитар дала бақлаўын әмелге асырыў тәртиби ҳаққында»ғы режеге тийкарланып мониторинг жүргизиў, сондай-ақ, фитосанитар дала бақлаўын әмелге асырыў тәртип-қағыйдалары түсиндирилди. Сондай-ақ, өсимликлер карантини илимий-изертлеў орайы Нөкис аймақлық филиалының қәнигелери тәрепинен аўыл хожалығы өнимлерин жетистириўшилердиң атызларында, атап айтқанда, бағларда ҳәм жүзим майданларында ушырасатуғын зыянкеслер менен кеселликлерге қарсы дәслепки химиялық қарсы гүресиў илажлары бойынша кең түрде мағлыўматлар берилди.
Семинарда атап өтилгениндей, Өзбекстан Республикасы Президентиниң 2020-жыл 13-октябрьдеги «Өсимликлер карантини бойынша мәмлекетлик хызметлердиң жумысларын буннан былай да жетилистириў илажлары ҳаққында»ғы қарары тийкарында өсимликлер карантини инспекциясының агроном-инспекторларына экспортқа мөлшерленген өнимлерди жетистиретуғын бағ, жүзим атызларын карантин организмлеринен қорғаў ўазыйпалары жүкленген. Сондай-ақ, шегаралас республикалардан зыянлы организмлердиң кирип келиўиниң алдын алыў, атызлардағы қәўипли зыянкеслер ошағын өз ўақтында анықлаў ҳәм оларға қарсы нәтийжели гүресиў илажларын белгилеў тийкарғы ўазыйпа сыпатында белгилеп берилген.
Семинар қатнасыўшылары қәнигелерден өзлерин қызықтырған сораўларға жуўап алды.
Қарақалпақстан хабар агентлиги.