Усы жыл 29-январь күни Қарақалпақстан тарийхы ҳәм мәденияты мәмлекетлик музейинде Өзбекстан Республикасының биринши Президенти И.Кәримовтиң туўылғанына 83 жыл толыў мүнәсибети менен «Сизден азат ҳәм абат Ўатан қалды» атамасында семинар өткерилди.
Семинар барысында И.Кәримовтиң Өзбекстан Республикасы ғәрезсизлигиниң тийкарын салыўшысы, мәмлекетимиздиң ғәрезсиз раўажланыў бағдарламасын ислеп шыққан ҳәм миллий раўажланыў жолын белгилеп берген атақлы мәмлекетлик искер екенлиги, Өзбекстан халқыниң ғәрезсизлик жылларында ерискен жетискенликлери оның исми ҳәм жумысы менен байланыслы екенлиги, демократиялық ҳуқықый мәмлекетти қурыў, пуқаралардың тынышлығын ҳәм миллий татыўлықты тәмийинлеўдеги қосқан мийнетлери кең түрде атап өтилди.
– Музейимизде биринши Президентимиз И.Кәримовтың өмир жолы, елимиздиң раўажланыўы ушын қосқан үлеси ҳаққында мектеп муғаллимлери арасында сәўбетлесиў ҳәм пикир алысыўлар өткерилмекте. Олар бүгинги семинардың мазмун-мәнисин өсип киятырған келешек әўладқа кең түрде үгит-нәсиятлайды, – дейди музей хызметкери Гүлназ Аллахова.
Қатнасыўшылардың билим дәрежесин сынақтан өткериў мақсетинде И.Каримовтың өмир жолы, мийнетлери ҳаққында тест дүзилип, сораў-жуўап ойынлары өткерилди.
Жеңимпазлар шөлкемлестириўшилердиң «Ҳүрмет жарлығы» менен сыйлықланды.
Т.СЕЙТНАЗАРОВА,
Қарақалпақстан хабар агентлигиниң шолыўшысы