Тил – ҳәр бир миллеттиң байлығы есапланады. Быйыл Қарақалпақ тилине мәмлекетлик тил бийлиги берилгенине 31 жыл толды.
Мине усы мүнәсибет пенен Қараөзек районлық Халық билимлендириў бөлимине қараслы 1-санлы улыўма орта билим бериў мектебинде «Тарийхымсаң, тәғдиримсең, келешегимсең, ана тилим!» атамасында байрам кешеси өткерилип, онда мектептиң 9-11-класс оқыўшылары Бердақ шайырдың дөретиўшилигине бағышланған «Хызмет еткил удайына халық ушын!» атамасындағы көркемлеп оқыў таңлаўында өз-ара беллести.
Таңлаў жуўмағында 10-класс оқыўшысы Улбосын Қуўанышбаева биринши орынды ийелеп республикалық басқышқа жоллама алды.
-Тил-бул жәмийетте адамлар арасында қарым-қатнас жасаўдың ең әҳмийетли қуралы есапланады. Тилсиз жәмийет, жәмийетсиз тил болмағанындай ҳәр бир миллеттиң, ҳәр бир халықтың ата-бабаларынан мийрас болып қалған өз ана-тили болады, – дейди усы мектептиң қарақалпақ тили ҳәм әдебияты пәни оқытыўшысы Гүлбаҳар Есимбетова. Мектебимизде «Ана тилим – сен басқадан айырмам!», «Китап руўхыйлығымыз» атамасында шығармалар таңлаўы өткерилди.
Илаж қатнасыўшыларына мектептиң талантлы оқыўшылары тәрепинен таярланған концерт бағдарламасы қойып берилди.
Қарақалпақстан хабар агентлиги