Өзбекстан Республикасы Президентиниң Шымбай районындағы Халық қабыллаўханасында пуқаралардың суд-ҳуқық қорғаў тараўына тийисли болған мүрәжатлары бойынша онлайн қабыллаў болды.

Жынаятшылық профилактикасын буннан былай да беккемлеў, әдил судлаўды тәмийинлеў, усы тараўда пуқараларды қыйнап киятырған машқалаларды унамлы шешиў мақсетинде Қарақалпақстан Республикасы судларының, прокуратура ҳәм ишки ислер министрлиги басшыларының пуқараларды онлайн қабыллаўлары басланды.

Биринши мәрте Шымбай районында басланған онлайн қабыллаўда физикалық ҳәм юридикалық тәреплерден жәми 17 мүрәжат келип түсти. Соннан 8 пуқараға ҳуқықый түсиник берилди, 9 мүрәжаттың шешими Халық қабыллаўханасы тәрепинен қадағалаўға алынды.

Өзбекстан Республикасы Президентиниң Қарақалпақстан Республикасындағы Халық қабыллаўханасы баспасөз хызметиниң мәлим еткениндей, бундай онлайн қабыллаўлар ҳәр айда еки мәрте өткериледи. Гезектеги онлайн қабыллаў усы жыл 27-ноябрь күни Хожели районында болып өтеди.

 

Қарақалпақстан хабар агентлиги