Президентимиздиң 2019-жыл 6-сентябрьдеги «Билимлендириў системасын буннан былай да жетилистириўге байланыслы қосымша илажлар ҳаққында»ғы пәрманына муўапық, Қараөзек экономика ҳәм турмыс хызмети кәсип-өнер колледжи тийкарында Қараөзек районы кәсип-өнер мектеби болып ашылып, бул жерде жаңа оқыў жылы басланды.
Кәсип-өнер мектеби халықаралық классификатордың 3-категориясына сәйкес келетуғын билимлендириў бағдарламалары тийкарында 9-класс питкериўшилерин социаллық қоллап-қуўатлаўға бағдарланған баслаўыш профессионаллық билимлендириў басқышында кадрлар таярлайтуғын билимлендириў орны болып есапланады.
Кәсип-өнер мектебине 4 қәнигелик бойынша 209 оқыўшы қабылланды. Олар «Автомобильлерди оңлаў слесары», «Тигиўшилик», «Электрик» ҳәм «Аўыл хожалығы өндирисинде электр үскенелерине хызмет көрсетиў ҳәм оңлаў электромонтёр» қәнигеликлери бойынша тәлим-тәрбия алады.
Бул жерде билимлендириўдиң жаңа талаплары тийкарында оқыўшыларға кәсиплик ҳәм улыўма билим пәнлери 2 жыл даўамында үйретиледи.
Мектепте заманагөй 3 компьютер бөлмеси, 13 оқыў аудиториясы, 5 оқыў лабороториясы ҳәм устаханасы бар.
Кәсип-өнер мектебинде теориялық ҳәм әмелий сабақларды оқытыў ҳәм үйретиў енгизилип, «Устаз-шәкирт» дәстүри жолға қойылған.
Бул оқыў дәргайында оқыўшыларға Өзбекстан Республикасы Мәмлекетлик бюджети есабынан базалық есаплаў муғдарының бир есеси муғдарында айлық стипендия және үш мезгил аўқат пенен тәмийинлеў тәртиби 2021-2022-оқыў жылынан баслап енгизиледи.
Т.СЕЙТНАЗАРОВА,
Қарақалпақстан хабар агентлигиниң шолыўшысы