АЎЫЛ ТУРҒЫНЛАРЫНА ИШИМЛИК СУЎЫ

Республикамыздың ең арқа аймағында жайласқан Тахтакөпир районы халқын таза ишимлик суўы менен тәмийинлеў бойынша бир қатар жойбарлар әмелге асырылмақта.

Бул бағдарда районлық суў тармақлары филиалына қараслы ҳәр бири 200 метр куб суў сақлайтуғын резервуар, аўыллық жерлерде 10 орында суўды тазалаўшы ЭКОС үскенеси ҳәм 2 орында суў жеткерип бериўши насос станциясы халыққа хызмет көрсетпекте.

Жақында районлық суў бөлистириў объектинде реконструкция жумыслары алып барылып, пайдаланыўға тапсырылды. Бул жерде «Реверстрой» жуўапкершилиги шекленген жәмийети қурылысшылары тәрепинен 1 миллиард 170 миллион сумлық жумыс көлеми орынланды.

Буннан тысқары, «Гранит монтаж строй» фирмаси жәмәәти тәрепинен районлық суў тармақлары филиалына қараслы лаборатория имаратында реконструкция, «Тахтакөпир» аўыл пуқаралар жыйыны аймағындағы «Пишенкөл» насос станциясында 1 миллиард 705,6 миллион сумлық қурылыс жумыслары әмелге асырылды. Нәтийжеде «Пишенкөл» аўылына 5,2 километр узынлықтағы таза ишимлик суўын жеткерип бериўши суў қубыры орнатылды.

Районда бул бағдардағы жумыслар даўам етпекте. Атап айтқанда, «Жаңадәрья», «Белтаў» ҳәм «Маржанкөл» аўыл пуқаралар жыйынлары аймағында суўды душшыландырыўшы үскенелерди реконструкциялаў жумыслары алып барылмақта.

 

Қарақалпақстан хабар агентлиги

  16.09.2020, 11:27  |    68 мәрте көрилди

Thanks!

Our editors are notified.