Елимизде технологияның имканиятларынан нәтийжели пайдаланыў, әсиресе, ҳәзирги пандемия жағдайында пуқаралар ушын аралықтан турып өз жумысларын питкериў, сондай-ақ, мүрәжатларын билдириў ушын бир қатар илажлар әмелге асырылмақта.
Салық хызметиниң тутыныўшылардың ҳуқықларын қорғаўға жәрдем бериўге хызмет ететуғын “Soliq hamkor” – жәмийетлик қадағалаўының жаңа бағдарламасы жолға қойылды.
– Бундай қадағалаў түри саўда ислеў ямаса басқа да орынлардағы касса машинасынан тутыныўшылар тәрепинен сатып алынған өним ушын чек берилмесе, терминал арқалы төлем қабыл етилмесе, тутыныўшылардың ҳуқықларын қорғаўға хызмет етеди,-дейди басқарма қәнигеси М.Мершиева. – Себеби, хызмет көрсетиўшилердиң ямаса саўда орынларының бундай ис-ҳәрекетлери салық ҳуқықбузарлығы болып есапланады.
Сондай-ақ, тутыныўшылар енди, жаңа имканияттан пайдаланып, “Soliq hamkor” бағдарламасы, @soliq_hamkor_bot қосымшасы, @soliq_hamkor_bot телеграм-боты, салық уйымларының электрон мәмлекетлик хызметлери порталы – my.soliq.uz арқалы, салық ҳуқықбузарлықлары ҳаққында хабар берип, салық уйымлары менен аралықтан бирге ислесе алады.
Қарақалпақстан хабар агентлиги