Жанажан журтымызда байрам нәпеси гезип, кеўиллеримизди гөззал сезимлерге бөлемекте. Бул еӊ әзиз ҳәм улыўма миллий — Ғәрезсизлик байрамы болып, халқымызға көтериӊки кейпият бағышлап, уллы мақсетлерге умтылдырмақта. Пүткил дүнья жүзине қәўип туўдырған пандемия бираз шегинип, абадан турмысымыз әсте-ақырынлық пенен өз изине түспекте. Әзелден мәрт, күш-ғайратлы, меҳир-мириўбетли халқымыз еле де бирлесип, айдын келешегимиз жолына үмит шырақларын жағып, көпке үлги болмақта.
Усындай сынақлы күнлерде Президентимиз халқымызды руўхый ҳәм материаллық жақтан қоллап-қуўатлап, ғамхорлық етпекте.
Ҳүрметли Президентимиз Шавкат Мирзиёев Өзбекстан Республикасы мәмлекетлик ғәрезсизлигиниӊ 29 жыллығы мүнәсибети менен Ўатанымыздыӊ ғәрезсизлигин беккемлеўге қосқан үлеси ҳәм мәмлекетимиздиӊ түрли тараўларын раўажландырыўдағы нәтийжели хызметлери ушын бир топар социаллық-экономикалық тараў хызметкерлерин ҳүрметли атақлар ҳәм орденлер менен сыйлықлаў бойынша усы жылдыӊ 27-август күни Пәрман имзалады.
Сыйлықланғанлар арасында қарақалпақ мәденияты ҳәм көркем өнер тараўында жемисли дөретиўшилик етип атырған бир топар хызметкерлердиӊ бар екенлиги де бәршемизди шексиз қуўанышқа бөледи.
Халқымызға пидайы хызмет етип атырған тараў хызметкерлеринен: Бердақ атындағы Қарақалпақ мәмлекетлик академиялық театрыныӊ вокал артисти Мырзагүл Сапаева «Меҳнат шуҳрати», Қарақалпақстан Республикасы Көзи әззилер китапханасы директоры Алима Ахетова ҳәм Әжинияз атындағы Нөкис мәмлекетлик педагогикалық институтыныӊ музыкалық тәлим кафедрасыныӊ доценти Айгүл Надыровалар «Дўстлик» орденлери, Өзбекстан мәмлекетлик филармониясы жанындағы «Мухаллес» дуўтаршылар ансамбли бақсы-сазендеси Едилбай Акимов ҳәм Қарақалпақ мәмлекетлик Қуўыршақ театрыныӊ актёры Насиба Генжебековалар «Шуҳрат» медаллары менен сыйлықланыўы байрам алдынан үлкен саўға болды. Мәмлекетимиздиӊ ҳүрметли орден, медальлары менен сыйлықланған тараўдыӊ жанкүйер хызметкерлерин шын жүректен қутлықлап, халқымызға аянбай хызмет етиўде таўсылмас күш-жигер тилеймен. Оларға берилген сыйлықлар,әлбетте, жәмәәтимизге берилген сыйлық деп түсинемиз ҳәм өз гезегинде бул итибар ҳәм ғамхорлық барлық дөретиўшилеримизге илҳәм-йош, күш-ғайрат бағышлап, уллы ислерге руўҳландыратуғыны анық.
Пурсаттан пайдаланып гүллән халқымызды соныӊ ишинде мәденият ҳәм көркем өнеримиздиӊ гүллән жәмәәтин ғәрезсизлигимиздиӊ 29 жыллық байрамы менен қызғын қутлықлайман.
Көркем өнер ҳәм мәдениятымызды раўажландырыў жолындағы жемисли хызметлериӊиз даўамлы болсын!
Қалбай ТУРДИЕВ,
Қарақалпақстан Республикасы Мәденият министри
Қарақалпақстан хабар агентлиги