Өзбекстан Миллий мәлимлеме агентлиги – ӨзА ҳәм Өзбекстан Республикасы Сыртқы ислер министрлигиниң «Дүнья» мәлимлеме агентлиги арасында бирге ислесиў ҳаққындағы меморандумға қол қойылды.
Бүгинги күнде барлық тараўлар қатарында ғалаба хабар қураллары алдына да өз жумысын заман талаплары дәрежесине көтериўди талап етпекте. Елимиз турмысының түрли тараўларындағы кең көлемли өзгерислер ҳәм жаңаланыў процеси ҳаққындағы хабарларды халқымыз бенен жәмийетшиликке оператив ҳәм исенимли жеткерип бериў ушын мәлимлеме агентликлеринен профессионаллық шеберлик және нәтийжели бирге ислесиў талап етилмекте.
Өзбекстанның еки жетекши мәлимлеме агентлиги арасында хабар алмасыў бойынша бирге ислесиўдиң жолға қойылғаны елимизде әмелге асырылып атырған демократиялық реформаларды ҳәр тәреплеме сәўлелендириў, мәлимлеме мәканын және де оператив, исенимли хабарлар менен тәмийинлеўде әҳмийетли қәдем болды.
Меморандумда агентликлер арасында Өзбекстанда ҳәм дүньяда жүз берип атырған ўақыялар туўралы турақлы мәлимлеме алмасыў, мәлимлеме тараўындағы бирге ислесиўди кеңейтиў, өз-ара тәжирийбе алмасыў, журналистлердиң шеберлигин арттырып барыў сыяқлы мақсетлер белгиленген.
Буннан былай «Дүнья» жаңалықлары ӨзА каналлары арқалы және де кең аудиторияға тарқатылады, өз гезегинде «Дүнья» АА ӨзА хабарларын мәмлекетимиздиң сырт елдеги дипломатиялық ўәкилханалары арқалы сырт еллерде кеңнен ен жайдырыўға өз үлесин қосады. Бул болса Өзбекстанды раўажландырыўдың жаңа жетискенликлеринен дүнья халқын буннан былай да кеңирек хабардар етиўге хызмет етеди.
ӨзА