Бүгинги күнде аўыл хожалығында жетистирилип атырған  фитосанитар  таза  өнимлер  тек ишки базарларда емес, ал сыртқы базарларда да өзиниң қарыйдарына ийе болмақта.

Республикамыздың Төрткүл ҳәм  Қоңырат районларында, сондай-ақ, Нөкис қаласында сыртқы экономикалық байланыс бажыхана  постларында экспортлық ҳәм импортлық өнимлер өсимликлер карантини агроном-инспекторлары  тәрепинен  карантин тексериўинен өткерилип, фитосанитар сертификаты ҳәм карантин актлери  рәсмийлестирилмекте.

– Усы жылдың июнь айында сыртқы экономикалық байланыс бажыхана постлары арқалы 7493 тонна карантин астындағы өнимлер тексериўден өткерилип, Қазақстан, Тажикстан, Қытай, Корея республикаларына ҳәм Россия федерациясына экспортқа шығарылды,-дейди  Өсимликлер  карантини  мәмлекетлик инспекциясының сыртқы карантин бойынша жетекши агрономы Арал Сапарниязов.- Сондай-ақ, 7056 тонна  аўыл-хожалығы өнимлери,  134,891 м2  ағаш өнимлери карантин тексериўинен өткерилип, карантин актлери рәсмийлестирилди.

Елимизде жетистирилип, экспортқа  шығарылып атырған өнимлердиң фитосанитариялық тазалығын тәмийинлеў өсимликлер карантини агроном-инспекторларының баслы ўазыйпасы. Себеби, тек сапалы, зыянланбаған таза өнимлер дүнья базарларында турақлы орын ийелеп, мәмлекет экономикасын  раўажландырыўға хызмет етеди.

 

Қарақалпақстан хабар агентлиги