7-август күни Өзбекстан Республикасы Президенти Шавкат Мирзиёевтиң Америка Қурама Штатлары Президенти Дональд Трамп пенен телефон арқалы сөйлесиўи болып өтти.

Сөйлесиў алдында Өзбекстан басшысы Дональд Трампты АҚШ ғәрезсизлигиниң 250 жыллығы менен және бир мәрте қутлықлады.

Президент Трамп, өз гезегинде, Өзбекстан – Америка қатнасықлары мисли көрилмеген дәрежеге жеткенин ҳәм еки ел жетекшилери арасында исенимге тийкарланған тығыз сөйлесиў орнатылғанын атап өтти.

Жоқары дәрежеде ерисилген барлық келисимлердиң избе-из әмелге асырылып атырғаны қанаатланыўшылық пенен атап өтилип, стратегиялық шериклик қатнасықларын және де раўажландырыў перспективалары көрип шығылды.

Өз-ара бирге ислесиўдиң дерлик барлық бағдарларын қамтып алған еки тәреплеме сөйлесиў ҳәм алмасыўлардың жедел пәтине жоқары баҳа берилди.

Үш жыллық экономикалық бирге ислесиў бағдарламасы избе-из әмелге асырылмақта. Америка – Өзбекстан исбилерменлик ҳәм инвестиция кеңесиниң биринши мәжилиси болып өтти. Өзбекстан аймақлары ҳәм Америка штатлары арасындағы бирге ислесиў кеңейип бармақта. АҚШ пуқаралары ушын визасыз тәртип енгизилгени исбилерменлик байланысларының жеделлесиўине хызмет етпекте.

Пуқаралық авиация, автомобиль қурылысы, таў-кән санааты, инфраструктура, энергетика, металлургия, жасалма интеллект, санлы технологиялар ҳәм басқа да тараўларда биргеликтеги жойбарлар әмелге асырылмақта.

Халықаралық әҳмийетке ийе мәселелер додаланып, глобаллық қәўипсизликти тәмийинлеў, халықаралық ҳәм регионаллық келиспеўшиликлерди тыныш жол менен шешиў бағдарындағы ҳәрекетлерди даўам еттириў әҳмийетли екени атап өтилди.

Жетекшилер болажақ еки ҳәм көп тәреплеме илажлардың режесин де көрип шықты.

Сөйлесиў жуўмағында Президент Шавкат Мирзиёев Президент Дональд Трампқа өзи ушын қолайлы ўақытта рәсмий сапар менен елимизге келиўди усыныс етти.

ӨзА