Президент Шавкат Мирзиёев мәмлекетлик пуқаралық хызметкерлердиң айлық мийнет ҳақы системасы ҳәм мийнетке ҳақы төлеў шәртлерин муўапықластырыў бойынша усыныслардың презентациясы менен танысты.

Соңғы жыллары мәмлекетлик хызметте кадрларды таңлаў, жумысқа жайластырыў ҳәм хошаметлеў системасын жетилистириў бойынша кең көлемли реформалар әмелге асырылды.

Мәмлекетлик пуқаралық хызметкерлериниң ҳуқықларын, миннетлемелерин ҳәм жумысының тийкарғы принциплерин белгилеп берген айрықша нызам қабыл етилди. Мәмлекетлик уйымларда басқарыў хызметкерлериниң штат бирликлери 2016-жылдағы 73 мыңнан 54 мыңға оптималластырылды.

Презентацияда әмелдеги мийнетке ҳақы төлеў системасында сақланып қалып атырған теңсалмақсызлықлар талланды.

Бүгинги күнде мәмлекетлик хызметкерлердиң мийнет ҳақысы қурамында лаўазым мийнет ҳақысының үлеси 15 проценттен артпайды. Мийнет ҳақы фондының 70 процентке шекемги бөлегин хызметкердиң анық нәтийжесине байланыслы болмаған ҳәр қыйлы үстеме, сыйлық ҳәм хошаметлеўши төлемлер қурайды.

Нәтийжеде бирдей лаўазымда ҳәм уқсас ўазыйпаларды атқарып атырған хызметкерлердиң мийнет ҳақысы арасында үлкен парық пайда болған. Айырым министрликлер ҳәм уйымлардың аймақлық бөлимлериниң хызметкерлери ўәлаят, район ҳәм қала ҳәкимликлериндеги тап сондай лаўазым ийелери менен салыстырғанда теңлик принциплерине әмел етилмей атырғаны атап өтилди.

Мийнетке ҳақы төлеў системасын тәртипке салатуғын бирден-бир ҳуқықый ҳүжжет жоқ. Көпшилик мәмлекетлик уйымларда қолланылып атырған мийнетке ҳақы төлеў шәртлери бойынша 50 ден аслам айрықша нормативлик ҳүжжет әмел етпекте.

Сонлықтан, мәмлекетлик пуқаралық хызметкерлериниң мийнетине ҳақы төлеўдиң бирден-бир, ашық-айдын ҳәм нәтийжеге тийкарланған системасын енгизиў усыныс етилди.

Жаңа система менен 54 мың мәмлекетлик хызметкерди қамтып алыў нәзерде тутылған. Мәмлекетлик уйымлар миллий, республикалық, аймақлық және районлық ҳәм қалалық дәрежелерге, хызметкерлер болса атқаратуғын ўазыйпаларына қарап ҳәкимшилик басқарыў, тийкарғы ҳәм қоллап-қуўатлаў топарларына бөлинеди.

Халықаралық тәжирийбе тийкарында 11 разряд ҳәм 6 басқыштан ибарат жаңа мийнет ҳақы сеткасын енгизиў усыныс етилди. Оннан аслам үстемелер ҳәм сыйлықлар орнына үш тийкарғы хошаметлеў төлеми енгизиледи.

Соның ишинде, маманлық дәрежеси, хызметкердиң функционаллық ўазыйпаларды орынлаўы, орынлаў ҳәм мийнет тәртиби, интакерлиги тийкарында баҳаланатуғын нәтийжелилик көрсеткишлери – KPI ушын үстеме төленеди.

Сондай-ақ, әҳмийетли ҳәм қурамалы ўазыйпаларды орынлаған, инновациялық қатнасларды енгизген және жоқары нәтийже көрсеткен хызметкерлерге есабат дәўири жуўмақлары бойынша бонус төлемлерин бериў нәзерде тутылмақта.

Аймақлық басқармалар хызметкерлериниң мийнет ҳақысы тийисли ҳәкимликлердеги уқсас лаўазымлардың мийнет ҳақысынан жоқары болмайды. Район ҳәм қалаларда мийнет ҳақы және штат бирликлерин белгилеўде халықтың саны ҳәм аймақтың өзине тән өзгешеликлери есапқа алынады.

Ең әҳмийетлиси, ҳәр бир мәмлекетлик хызметкер мийнет ҳақысы қалай қәлиплесиўи, қайсы нәтийже ушын үстеме ямаса бонус алыўын алдыннан биледи. Бул хызметкерлердиң нәтийжелилиги, интакерлиги ҳәм жуўапкершилигин арттырыўға хызмет етеди.

Мәмлекетимиз басшысы мийнетке ҳақы төлеў системасында әдиллик ҳәм ашық-айдынлықты тәмийинлеў, мийнет ҳақыны хызметкердиң маманлығы, жуўапкершилиги ҳәм ерискен нәтийжелери менен байланыстырыў әҳмийетли екенлигин атап өтти.

Сондай-ақ, бонус төлемлери хызметкердиң алдынғы мәлимлеме технологияларын, соның ишинде, жасалма интеллект, заманагөй билим ҳәм көнликпелерди ийелегени, тәжирийбе ҳәм маманлығын арттырғаны сыяқлы анық нормалар тийкарында төлениўи белгиленди.

ӨзА