Президент Шавкат Мирзиёевқа жанылғы-энергетика тараўында пуқаралардың мүрәжатларын көрип шығыў ҳәм оларда көтерилген мәселелерды гүзги-қысқы мәўсимге таярлық шеңберинде сапластырыў бойынша мағлыўмат берилди.

Халықты электр энергиясы ҳәм газ бенен турақлы тәмийинлеўде пуқаралардың мүрәжатларын талқылаў, олар тийкарында орынлардағы машқалаларды анықлап, мәнзилли илажлар көриў әҳмийетли.

2026-жылдың бириншы ярымында жанылғы-энергетика тараўына байланыслы 39 мың 220 мүрәжат келип түскен. Бул өткен жылдың сәйкес дәўирине салыстырғанда 13 мың 820 ямаса 26,1 процентке кем.

Олардың 50 проценти тәбийий ҳәм суйылтырылған газге, 38,3 проценти электр тәмийнатына байланыслы.

Мүрәжатларда тийкарынан суйылтырылған газ баллонларын толтырыў, электр тәмийнатындағы үзилислер, электр тармақларын қурыў ҳәм оңлаў және тәбийий газ басымы менен байланыслы мәселелер көтерилген.

Мүрәжатлардың улыўма саны азайғанына қарамастан, ҳәр бир мүрәжатты жеке жағдай сыпатында емес, ал белгили бир аймақ, тармақ ямаса хызметтеги машқаланы көрсететуғын әҳмийетли сигнал сыпатында үйрениў зәрүрлиги атап өтилди.

Гүзги-қысқы мәўсим алдынан тәкирар мүрәжатлар келип түсип атырған мәҳәлле ҳәм объектлерди хатлаўдан өткериў, электр ҳәм газ тармақларының техникалық жағдайын үйрениў, анықланған кемшиликлерди сапластырыў бойынша аймақлар кесиминде мәнзилли режелер ислеп шығыў ўазыйпасы қойылды.

Әсиресе, электр тәмийнатында үзилислер көп бақланып атырған аймақларда тармақ ҳәм трансформаторларды оңлаў, авариялық бригадалардың таярлығын арттырыў, тәбийий газ басымы менен байланыслы машқалалар бар орынларда тәмийнаттың турақлылығын тәмийинлеў әҳмийетлилиги атап өтилди.

Соның менен бирге, суйылтырылған газ баллонларын толтырыў ҳәм халыққа жеткерип бериў графиклерине қатаң әмел етиў, талап жоқары болған аймақларда қосымша резерв ҳәм имканиятлардан пайдаланыў зәрүрлиги көрсетип өтилди.

Мәмлекетимиз басшысы жуўапкерлерге мүрәжатларда көтерилген системалы машқалаларды гүзги-қысқы мәўсими басланғанға шекем шешиў, бул бойынша жергиликли ҳәкимликлер, «мәҳәлле жетилиги» ҳәм коммуналлық хызмет көрсетиўшы шөлкемлер менен биргеликте системалы жумыс алып барыў зәрүрлигине итибар қаратты.

Мәўсимге таярлық жумысларын мүддетинде ҳәм сапалы жуўмақлаў, халық және социаллық тараў объектлерине тәбийий ҳәм суйылтырылған газ, соның менен бирге, басқа да жанылғы ресурсларын турақлы жеткерип бериў бойынша тийисли көрсетпелер берди.

ӨзА