Өзбекстан Республикасы Президенти Шавкат Мирзиёев Ислам цивилизациясы I Халықаралық форумында қатнасыў ушын елимизге келген Ислам дүньясы билимлендириў, илим ҳәм мәденият шөлкеми (ICESCO) ниң бас директоры Салим ал-Маликти қабыллады.

Өзбекстан ҳәм Ислам бирге ислесиў шөлкеминиң бул абырайлы институты арасында көп тәреплемели шерикликти буннан былай да кеңейтиў мәселелери көрип шығылды.

Халықаралық структура менен әмелий бирге ислесиў избе-из раўажланып атырғаны қанаатланыўшылық пенен атап өтилди.

Өзбекстан халықаралық исламтаныў академиясында ICESCO кафедрасы жумыс алып бармақта. Усы жылы Ташкентте шөлкемниң офиси ашылды. Февраль айында Ислам дүньясы мәдений мийрасы комитетиниң гезектеги мәжилисиниң жуўмақларына бола, елимиздиң 7 материаллық ҳәм материаллық емес мийрас объекти ICESCO дизимине киргизилди.

Сөйлесиўде мәдений естеликлер ҳәм қолжазбаларды реставрациялаў, қорғаў ҳәм санластырыў, елимиздиң бай тарийхый мийрасын халықаралық медиа платформалар арқалы кеңнен үгит-нәсиятлаў, сондай-ақ, биргеликтеги илажлар өткериў мәселелерине айрықша итибар қаратылды.

Ушырасыў жуўмағында Өзбекстан Президенти халқымыздың бай мәдений мийрасын кеңнен ен жайдырыўға қосқан жеке үлеси ушын Салим ал-Маликти жоқары сыйлық – “Дўстлик” ордени менен сыйлықлады.

ӨзА