Ҳәзирги ўақытта Өзбекстан мәҳәллелери ассоциациясы тәрепинен Президентимиздиң “Мәҳәлле басқарыўын нәтийжели шөлкемлестириўге байланыслы қосымша илажлар ҳаққында“ғы пәрманының мазмун–мәнисин мәҳәллелерде кеңнен үгит–нәсиятлаў ҳәм оның орынланыўын нәтийжели тәмийинлеў мақсетинде “мәҳәлле жетилиги” ағзалары ушын оқыў–әмелий семинар өткерилмекте.

Пәрман менен Мәҳәлле жумысын раўажландырыў бойынша республикалық комиссия шөлкемлестирилди. “Мәҳәлле жетилиги” ағзаларының жумысын нәтийжели шөлкемлестириў, оларға өз ўазыйпаларын тийисли дәрежеде әмелге асырыўы ушын методикалық жәрдем бериў, мәҳәллелерде халықтың машқалаларын шешиў бойынша уйымлараралық бирге ислесиўди тәмийинлеў сыяқлылар оның тийкарғы ўазыйпалары етип белгиленди.

Бағдарламаға муўапық, қатнасыўшыларға пәрманның мазмун-мәниси, мәҳәлле баслығының стратегиялық басшы сыпатындағы орны, пуқаралар жыйынларының финанслық имканиятлары, ҳәким жәрдемшисиниң мәҳәлле экономикасын раўажландырыўдағы ўазыйпалары, ҳаял-қызлар белсендиси, жаслар жетекшиси, профилактика инспекторы, социаллық хызметкер ҳәм салық инспекторының өз-ара бирге ислесиўи бойынша әмелий усыныслар берилмекте.

Сондай-ақ, семинар даўамында “мәҳәлле жетилиги” жумысында бирден-бир жәмәәтлик басқарыў принциплерин енгизиў, ҳәр бир ағзаның жуўапкершилигин арттырыў ҳәм халықтың машқалаларын мәнзилли шешиўге қаратылған нәтийжели механизмлер бойынша пикир алысылмақта.

Назокат Усмонова, Носирхон Ҳайдаров (сүўрет), ӨзАның хабаршылары