Ташкент қаласында Халықаралық валюта қоры ҳәм Жәҳән банкиниң “Швейцария топары” гезектеги мәжилиси шеңберинде “Өз-ара байланыслылық: регионаллық бирге ислесиў, жеке меншик сектор инвестициялары ҳәм ашық саўда” атамасында жоқары дәрежедеги халықаралық семинар болып өтти.

Жергиликли ҳәм сырт ел мәмлекетлик уйымларының ўәкиллери, халықаралық финанс институтларының басшылары, экспертлер ҳәм қәнигелер қатнасқан илажда регион мәмлекетлери арасында экономикалық бирге ислесиўди кеңейтиў, жеке меншик сектор инвестицияларын хошаметлеў, саўда қатнасықларын буннан былай да еркинлестириў ҳәм транспорт-логистика байланыслылығын беккемлеўдиң әҳмийетли мәселелери додаланды.

Илажда Өзбекстан Республикасы Бас министриниң орынбасары – экономика ҳәм қаржы министри Жамшид Қўчқоров, Жәҳән банкиниң Европа ҳәм Орайлық Азия бойынша вице-президенти Антонелла Бассани ҳәм басқа да жоқары мәртебели қатнасыўшылар шығып сөйлеп, бүгинги глобаллық экономикалық шараятта регионаллық бирге ислесиў турақлы экономикалық өсиўди тәмийинлеў, инвестицияларды тартыў ҳәм мәмлекетлердиң бәсекиге шыдамлылығын арттырыўдың әҳмийетли факторы екенин атап өтти.

Додалаўлар ўақтында транспорт ҳәм логистика бағдарларын диверсификациялаў, саўда қәрежетлерин қысқартыў, қоңсы мәмлекетлер менен экономикалық интеграцияны тереңлестириў ҳәм өз-ара пайдалы байланысларды кеңейтиў тийкарғы ўазыйпалар сыпатында атап өтилди.

Соннан келип шығып, семинардың тийкарғы бөлими санлы инфраструктура, энергетика, транспорт ҳәм саўда жолларын раўажландырыў, трансшегаралық бирге ислесиўди кеңейтиў ҳәм жеке меншик сектор инвестицияларын тартыў мәселелерине бағышланды. Атап өтилгениндей, бундай жойбарлар Орайлық Азия мәмлекетлери арасындағы экономикалық байланысларды беккемлеў, саўда көлемин арттырыў ҳәм жаңа инвестициялық имканиятларды жаратыўда үлкен әҳмийетке ийе.

Семинарда Өзбекстанның Жәҳән саўда шөлкемине ағза болыў жолында әмелге асырып атырған избе-из реформалары да айрықша атап өтилди. Атап айтқанда, миллий нызамшылықты халықаралық стандартларға бейимлестириў, тәртипке салыў механизмлерин жетилистириў және инвесторлар ушын ашық-айдын ҳәм болжаў мүмкин болған бизнес орталығын қәлиплестириў мәмлекеттиң жәҳән экономикасына интеграцияласыўында айрықша әҳмийетке ие екени атап өтилди.

– Семинар даўамында Жәҳән банки топары, Халықаралық валюта қоры ҳәм басқа да халықаралық финанс институтларының регионаллық экономикалық басламаларды қоллап-қуўатлаўдағы әҳмийетли орнына айрықша итибар қаратылды. Алға қойылған баслама ҳәм усыныслар регионаллық экономикалық интеграцияны және де тереңлестириў, инвестициялық орталықты жетилистириў ҳәм жеке меншик сектордың қатнасын кеңейтиўге хызмет етеди. Ең әҳмийетлиси, бундай сөйлесиўлер мәмлекетлер арасындағы өз-ара исеним ҳәм экономикалық шерикликти беккемлеп, жаңа қоспа жойбарларды әмелге асырыў ушын беккем тийкар жаратады, – деди Экономика ҳәм қаржы министриниң баспасөз хаткери – мәлимлеме сиясаты мәселелери бойынша кеңесгөйи Рушана Умарова.

Додалаўлар жуўмағында қатнасыўшылар регионаллық бирге ислесиўди буннан былай да беккемлеў, тийкарғы инфраструктуралық жойбарларға мәмлекетлик ҳәм жеке меншик инвестицияларды кеңнен тартыў, ашық ҳәм қағыйдаларға тийкарланған саўда системасын раўажландырыў бойынша әмелий бирге ислесиўди избе-из даўам еттириў әҳмийетли екенлигин атап өтти.

Атап өтилгениндей, бул бағдарлардағы ҳәрекетлер Орайлық Азияда турақлы экономикалық өсиўди тәмийинлеў, жаңа инвестициялық имканиятларды жаратыў ҳәм мәмлекетлер арасындағы экономикалық интеграцияны және де тереңлестириўге хызмет етеди.

Н. ЗИЁДУЛЛАЕВА,

ӨзАның хабаршысы