Қәдирли ўатанласлар!

Ҳүрметли әнжуман қатнасыўшылары!

Бәринен бурын, сиз, әзизлерди Уллы жипек жолының кесилиспесинде жайласқан, ески ҳәм бийтәкирар Әндижан қаласының 2026-жылы “Түркий дүньяның мәденият пайтахты” деп жәрияланыўы шеңберинде өткерилип атырған илажлардың ашылыўы менен шын жүректен қутлықлайман.

Бүгинги мәресимде қатнасып атырған халықаралық шөлкемлердиң басшыларын, сырт мәмлекетлердиң елшилерин, түркий дүньяның белгили мәденият, әдебият ҳәм көркем өнер ғайраткерлерин қызғын қутлықлап, бәршеңизге жоқары ҳүрметимди ҳәм жақсы тилеклеримди билдиремен.

Пурсаттан пайдаланып, Халықаралық түркий мәденият шөлкеми – ТҮРКСАЙ басшылығы ҳәм Шөлкемге ағза мәмлекетлерге Әндижан қаласын “Түркий дүньяның мәденият пайтахты” деп жәриялағаны ушын терең миннетдаршылық билдиремен.

Әлбетте, Әндижан қаласының бундай жоқары ҳүрметке мүнәсип көрилгенин Өзбекстанның бай тарийхы, мәдений-мәнаўий мийрасы, елимиздиң түркий мәденияттың раўажланыўына қосқан бийбаҳа үлеси, мәмлекетимизде алып барылып атырған кең көлемли реформалардың халықаралық көлемдеги және бир тән алыныўы сыпатында қабыл етемиз.

Әзиз дослар!

Ўатанымыздың шығыс дәрўазасы болған Әндижан әсирлер даўамында мәденият, әдебият, көркем өнер ҳәм өнерментшилик тараўларындағы орайлардан бири болып келген. Бул теберик жерден уллы сәркарда ҳәм мәмлекетлик ғайраткерлер, теңсиз алымлар, шайыр ҳәм жазыўшылар, шебер көркем өнер шеберлери жетисип шыққанын пүткил түркий дүнья бәрқулла миннетдаршылық пенен тән алады.

Бул ҳаққында айтқанда, усы гөззал елдиң мақтанышы болған Бабур Мырзаның үлкен илимий ҳәм әдебий мийрасы, әскерий көркем өнери, классик шайырымыз Абдулҳамид Шолпанның азатлық ҳәм еркинлик қәдири бәлент лапыз бенен жырланған өлмес шығармаларының өзи көп нәрседен дерек беретуғынын атап өтиў зәрүр. Миллий аяқ ойыны көркем өнеримиздиң айқын үлгиси болған “Әндижан полкасы,” адамларымыздың пәк кеўли ҳәм ақылын өзинде жәмлеген аския көркем өнери тек ғана бизиң емес, ал пүткил көркем өнер сүйиўши халықлардың улыўма мәдений мүлкине айланған, десек, қәте болмайды.

Бундай бийбаҳа қәдириятлар ҳәм көркем өнер дүрданаларын қәстерлеп сақлаў ҳәм байытыў, олардан жас әўладымыз ҳәм дүнья мәдений жәмийетшилигине кеңнен пайдаланыў бағдарында ТҮРКСАЙ менен тығыз бирге ислесиўди жоқары қәдирлеймиз. Бул бағдарда ең сайланды әдебий шығармаларды өз ишине алған 100 томлық “Түркий әдебият дүрданалары” топламы басып шығарылып, оқыўшылардың қолына жетип барғаны, мәмлекетлеримизде биргеликте көплеген илимий әнжуман ҳәм конференциялар, түрли мәдений илажлар ҳәм презентациялар өткерилип атырғаны, усы жылдың апрель айында Ислам цивилизациясы орайында ТҮРКСАЙ офиси ашылғанын айрықша атап өтиў зәрүр.

Өзбекстанлы көркем өнер ҳәм мәденият ғайраткерлери бүгинги күнде халықаралық сахналарда, атап айтқанда, ТҮРКСАЙ тәрепинен өткерилип атырған абырайлы әнжуманлар, фестиваль ҳәм таңлаўларда табыслы қатнасып келмекте. Атап айтқанда, усы жылдың февраль айында балалар аяқ ойыны ҳәм сазенделик топарларымыз халықаралық фестивальда Гран-приди қолға киргизгени бәршемизди қуўандырды.

Булардың барлығы халықларымыздың терең тамырларға ийе туўысқанлық байланыслары бүгин де барған сайын беккемленип атырғанын айқын көрсетеди.

Қәдирли әнжуман қатнасыўшылары!

“Әндижан – Түркий дүньяның мәденият пайтахты” жойбары шеңберинде бир жыл даўамында мәмлекетимиз ҳәм туўысқан еллерде өткерилетуғын фестиваль ҳәм илимий әнжуманлар, көркем кеше ҳәм дөретиўшилик ушырасыўлар мәдений турмысымызда терең из қалдыратуғын, дослық ҳәм аўызбиршилик байланысларын және де беккемлейтуғын, жас әўлад ушын кең имканиятлар ашатуғын умытылмас ўақыя болып қалатуғынына исенемен.

Сизлерди және бир мәрте шын жүректен қутлықлап, бәршеңизге беккем денсаўлық, алдағы жумысыңызда үлкен табыслар тилеймен.

Өзбекстан дүрданалары, алтын ойпат гәўҳары – сулыў ҳәм пайызлы Әндижан қаласына хош келдиңиз, әзизлер!

Шавкат МИРЗИЁЕВ,

Өзбекстан Республикасы Президенти