Өзбекстан Республикасы Президенти Шавкат Мирзиёевтиң мирәт етиўине бола Германия Федеративлик Республикасы Президенти Франк-Вальтер Штайнмайер өмирлик жолдасы менен биргеликте елимизде рәсмий сапар менен болып тур.

Бүгин, 18-июнь күни жоқары мәртебели мийман Ташкенттеги Ислам цивилизациясы орайына келди.

Президент Франк-Вальтер Штайнмайер менен Өзбекстан Республикасы сыртқы ислер министри Бахтиёр Саидов ҳәм басқа да рәсмийлер бирге болды.

Ислам цивилизациясы орайы тарийхый ҳәм заманагөй илимди үйлестирген, қолжазба дереклерди санлы технологиялар тийкарында үйрениўге хызмет ететуғын ири халықаралық илимий-мәдений комплекс болып есапланады.

Миллий архитектуралық дәстүрлер ҳәм заманагөй дизайн көзқарасларының үйлесимлилигинде қурылған орайдың гүмбезлери, порталлары ҳәм нәзик нағыслы безеўлери оның бийтәкирар архитектуралық көринисин көрсетеди.

Жоқары мәртебели мийманға халқымыздың тарийхый раўажланыўының әҳмийетли басқышларын сәўлелендиретуғын “Исламға шекемги цивилизациялар”, “Биринши Ренессанс дәўири”, “Екинши Ренессанс дәўири”, “Өзбекстан XX әсирде” ҳәм “Жаңа Өзбекстан – Жаңа Ренессанс” бөлимлери толық таныстырылды. Бул экспозицияларда бул дәўирлердиң тарийхы бийбаҳа затлар, қолжазба дереклер, фотоматериаллар ҳәм заманагөй мультимедиа қураллары арқалы сәўлелендирилген.

Делегация ўәкиллери Қураны кәрим залында болып, ислам дүньясының ең сийрек ушырасатуғын естеликлериниң бири болған әййемги Усман Мушафи менен танысты. Бул бийбаҳа дерек өзиниң үлкен тарийхый ҳәм мәдений әҳмийети менен келиўшилерде үлкен тәсир қалдырады.

Германия Федеративлик Республикасы Президенти Франк-Вальтер Штайнмайер мәмлекетлераралық мәдений қарым-қатнас ҳәм руўхый жақынлықты беккемлеп, глобаллық шараятта халықаралық бирге ислесиўди күшейтиўде Ислам цивилизациясы орайының орны шексиз екенин атап өтти.

Марҳабо ҲОЖИАКБАРОВА, 
Сарвар ЎРМОНОВ (фото), ӨзА