Албания Республикасы Президентиниң елимизге рәсмий сапары шеңберинде Көксарай резиденциясында Өзбекстан Республикасының Биринши ханымы Зироат Мирзиёева ҳәм Албания Республикасының Биринши ханымы Арманда Бегайдың ушырасыўы болып өтти.

Ашық ҳәм қызғын сөйлесиў руўхында болып өткен ушырасыўда еки мәмлекет басшыларының өмирлик жолдаслары Өзбекстан ҳәм Албания халықлары арасындағы дослық ҳәм өз-ара түсинисиўди беккемлеў, сондай-ақ, мәдений-гуманитарлық бирге ислесиўди буннан былай да кеңейтиў мәселелерин додалады.

Мәдений бағдарлама даўамында жоқары мәртебели мийман өзбек әмелий көркем өнер шеберлериниң дөретиўшилик үлгилери, соның ишинде, ағашқа нағыс ойыў, әййемги сўзана кестешилиги техникасы ҳәм дәстүрий гүлалшылық буйымлары менен танысты.

Бағдарламаның жарқын ўақыяларынан бири дәстүрий өзбек кийимлериниң көргизбеси, сондай-ақ, мәмлекетимиздиң түрли аймақларына тән тәреплерди сәўлелендирген “Келин салом” мәресиминиң презентациясы болды. Жоқары мәртебели мийман өзбек халқының миллий дәстүрлери менен үрп-әдетлерине қызығыўшылық билдирип, олардың терең тарийхый тамырлары, гөззаллығы ҳәм бийтәкирарлығын айрықша атап өтти.

ӨзА