Өзбекстан Республикасы Президенти Шавкат Мирзиёевтиң мирәт етиўине бола Германия Федеративлик Республикасы Президенти Франк-Вальтер Штайнмайер өмирлик жолдасы менен биргеликте 17-18-июнь күнлери рәсмий сапар менен елимизде болады.

Сапар бағдарламасына муўапық, еки мәмлекет басшыларының тар ҳәм кеңейтилген қурамдағы сөйлесиўлери болып өтеди. Өзбекстан – Германия көп қырлы қатнасықларын буннан былай да раўажландырыў мәселелери додаланады.

Тәреплер саўда, санаат кооперациясы, энергетика ҳәм “жасыл” технологиялар, транспорт ҳәм логистика, фармацевтика ҳәм химия санааты, аўыл хожалығы тараўларында әмелий бирге ислесиўди кеңейтиў, билимлендириў ҳәм гуманитарлық алмасыўларды жеделлестириў мәселелерине айрықша итибар қаратады.

Халықаралық ҳәм регионаллық әҳмийетке ийе актуал темалар бойынша да пикир алысылады.

Сөйлесиўлер шеңберинде бир қатар жаңа биргеликтеги жойбар ҳәм бағдарламаларды иске қосыў және Өзбекстан ҳәм Германия арасындағы өз-ара пайдалы бирге ислесиўди буннан былай да раўажландырыўға қосымша пәт бағышлайтуғын ҳүжжетлер топламын қабыл етиў режелестирилген.

ӨзА