Президент Шавкат Мирзиёев қорғаныў тараўындағы айырым мәселелер бойынша презентация менен танысты

Соңғы жылларда Қураллы Күшлер Жоқарғы Бас Сәркардасы басшылығында елимиздиң қорғаныў системасы раўажланыўдың жаңа басқышына көтерилди. Атап айтқанда, ҳаўа шегараларымызды беккемлеў, шегаралар қол қатылмаслығын исенимли қорғаў мақсетинде Ҳаўа ҳүжиминен қорғаныў әскерлери ҳәм Әскерий ҳаўа күшлери избе-из реформаланбақта.

Реформалар нәтийжесинде әскерлер заманагөй авиация техникалары, ҳаўа ҳүжиминен қорғаныў системалары ҳәм ушыўшысыз ушыў аппаратлары менен тәмийинленбекте. Әмелий ушыў шынығыўларының көлеми бир неше есеге арттырылып, авиация бөлимшелериниң жаўынгерлик таярлығы беккемленбекте.

Презентацияда заманагөй билим ҳәм көнликпелерге ийе, ўатансүйиўши ҳәм профессионал миллий кадрларды таярлаў мәселесине айрықша итибар қаратылды.

Мәмлекетимиз басшысының басламасы менен Әскерий қәўипсизлик ҳәм қорғаныў университетиниң Қаршы қаласында жайласқан Әскерий авиация институтының оқыў-материаллық базасы халықаралық билимлендириў стандартлары тийкарында үскенеленген еди.

Институтта заманагөй оқыў тренажёрлары, модельлестириў ҳәм симуляция қураллары енгизилген. Теория ҳәм әмелияттың үйлесимлилигинде шөлкемлестирилип атырған шынығыўлар курсантларға авиация тараўын терең өзлестириў имканиятын бермекте. “Устаз-шәкирт” дәстүри тийкарында курсантлар “Ханабад” аэродромында тәжирийбели қәнигелер жәрдеминде әмелий көнликпелерин беккемлемекте.

Презентацияда ҳаўа шегараларын қорғаўдың пүткиллей жаңа системасын енгизиў, авиация бөлимлерин заман талапларына сәйкес түрде қайта шөлкемлестириў бойынша усыныс етилип атырған илажлар көрип шығылды.

Бул жумыслар Әскерий ҳаўа күшлериниң жаўынгерлик қәбилетин ҳәм әмелий имканиятларын және де арттырыўға, әскерлердиң оперативлигин, ҳәрекетшеңлигин ҳәм заманагөй қәўип-қәтерлерге жуўап бериў потенциалын күшейтиўге хызмет етеди.

Сондай-ақ, әскерий медицина саласында Түркия менен бирге ислесиўди раўажландырыў мәселеси де көрип шығылды. Президентимиздиң усы жылы январь айында Түркияға сапары даўамында еки мәмлекет ҳүкиметлери арасында әскерий медицина тараўында билимлендириў ҳәм бирге ислесиў келисимине қол қойылған еди.

Презентацияда усы келисим шеңберинде әмелге асырылыўы усыныс етилип атырған илажлар ҳаққында мәлимлеме берилди. Қәнигелерди емлеў иси, стоматология, фармацевтика, профилактика, медициналық кәсип-өнер ҳәм мийирбийкелик жоқары билимлендириў бағдарларында, магистратура ҳәм аспирантурада оқытыў, әскерий шыпакерлерди қайта таярлаў ҳәм маманлығын арттырыў нәзерде тутылмақта.

Буннан тысқары, медицинаның илимий бағдарларында бирге ислесиў, семинар, конгресс ҳәм симпозиумлар өткериў, оқытыўшы, мәсләҳәтши, илимий хызметкер ҳәм студентлер алмасыўын жолға қойыў, биргеликтеги сабақлар шөлкемлестириў, наўқасларды биргеликте емлеў ҳәм медицина мәкемелерин қурыў бойынша бирге ислесиўди кеңейтиў режелестирилмекте.

Презентацияда қорғаныў ислери уйымларында шақырылыўшыларды дизимге алыў, медициналық ҳәм шақырыў комиссияларының жумысын санластырыў бойынша усыныслар да көрип шығылды. Бул процесслердиң ашық-айдынлығын ҳәм жеделлигин арттырыў, пуқаралар ушын қолайлылық жаратыў әҳмийетли екенлиги атап өтилди.

Соның менен бирге, қорғаныў ислери уйымлары пуқара хызметкерлериниң мийнет ҳақысын басқышпа-басқыш арттырыў, әскерий хызметкерлерге Ташкент ҳәм Самарқанд қалаларында турақ жай ижарасы ушын төленетуғын ҳәр айлық пул компенсациясы муғдарын көбейтиў бойынша усыныслар билдирилди.

Президентимиз әскерлердиң жаўынгерлик таярлығын ҳәм таярлығын арттырыў, әскерий басқарыў ҳәм билимлендириў системасына алдынғы тәжирийбелерди енгизиў бойынша тийкарғы ўазыйпаларды белгилеп берди.

Жуўапкерлерге әскерий билимлендириў системасындағы реформаларды избе-из даўам еттириў, әскерлерди кәсипке үйретиў, оларды жоқары билимлендириў мәкемелерине таярлаў ҳәм оның ушын мүнәсип шараятлар жаратыў бойынша анық тапсырмалар берилди.

ӨзА