“Uzbekistan Airports” баспасөз хызметиниң хабар бериўинше, 2-июнь күни Ташкент халықаралық аэропортында Арменияның Shirak Avia авиакомпаниясы тәрепинен әмелге асырылған Ереван – Ташкент жөнелисиндеги биринши турақлы рейс салтанатлы күтип алынды. Усы тәризде Өзбекстан ҳәм Армения пайтахтлары арасында соңғы он жыллықлардан кейин және тиккелей ҳаўа қатнаўы жолға қойылды.

Мәлим етилиўинше, Ереваннан ушып келген биринши рейс пенен Ташкентке 127 жолаўшы жетип келген. Авиация дәстүрлерине муўапық, самолёт суў аркасы астында күтип алынды, экипаж ағзаларына болса гүллер усынылды.

Сондай-ақ, Ташкент халықаралық аэропортында Ташкент – Ереван жөнелисиндеги биринши рейс жолаўшыларын дизимнен өткериў мәресими де шөлкемлестирилди. Биринши рейс пенен Армения пайтахтына 177 жолаўшы жөнеп кетти.

Жаңа авиайöналыс еки мәмлекет арасындағы туризм, бизнес байланыслары ҳәм мәдений-гуманитарлық бирге ислесиўди буннан былай да раўажландырыўға хызмет етеди.

Пәрўазлар Boeing 737 маркалы самолётларда ҳәптесине бир мәрте әмелге асырылады. Бул жөнелис ашылғанша Өзбекстан ҳәм Армения арасында сапар етиўши жолаўшылар Москва, Стамбул, Тбилиси ҳәм басқа да қалалар арқалы транзит рейслерден пайдаланыўға мәжбүр еди.

Еслетип өтемиз, Ташкент ҳәм Ереван арасында тиккелей авиақатнаўларды жолға қойыў мәселеси биринши мәрте 2017-жылы Өзбекстан ҳәм Армения ҳүкиметлери басшыларының ушырасыўында додаланған еди. 2026-жыл май айынан болса усы жөнелис бойынша турақлы пәрўазларды жолға қойыў режелестирилгени ҳаққында хабар берилген еди.

2019-жылдан берли жумыс алып барып атырған Shirak Avia авиакомпаниясы Еревандағы Звартноц халықаралық аэропорты базасында ислейди ҳәм бир қатар халықаралық жөнелислерде хызмет көрсетеди. Компания авиапарки Boeing 737 топарына тийисли самолётлардан қуралған.

Ш.Маматуропова,

ӨзА