Түркстан қаласында болып өтип атырған Түркий мәмлекетлер шөлкеминиң рәсмий емес саммити шеңберинде Өзбекстан Республикасы Президенти Шавкат Мирзиёев ҳәм Қырғыз Республикасы Президенти Садир Жапаровтың ушырасыўы болып өтти.

Қызғын сөйлесиўде Өзбекстан – Қырғызстан дослық, жақсы қоңсышылық ҳәм кең көлемли стратегиялық шериклик қатнасықларын буннан былай да беккемлеўдиң әҳмийетли мәселелери көрип шығылды.

Өз-ара саўда көлеми жедел өсип, санаат, аўыл, суў хожалығы ҳәм басқа да тийкарғы тараўларда кооперациялық жойбарлары алға қойылып атырғаны қанаатланыўшылық пенен атап өтилди. Мәдений-гуманитарлық алмасыўлар кеңейип бармақта.

Жоқары дәрежеде ерисилген келисимлерди әмелге асырыў мәселелери, энергетика ҳәм транспорт тараўларындағы ири регионаллық жойбарларды, соның ишинде, “Қытай-Қырғызстан-Өзбекстан” темир жолы қурылысын жеделлестириў илажлары додаланды.

Сондай-ақ, жетекшилер регионаллық күн тәртибиниң әҳмийетли тәреплери бойынша пикир алысты ҳәм болажақ жоқары дәрежедеги илажлардың режесин көрип шықты.

ӨзА