Президентимиз тәрепинен алға қойылған ҳәм бүгинги күнде турақлы әмелге асырылып атырған “Ҳәр пийшемби – Жаслар күни” басламасы елимизде жаслар менен ислесиўдиң пүткиллей жаңа, нәтийжели ҳәм мәнзилли системасын қәлиплестирмекте. Бул баслама жаслардың тек ғана машқалаларын тыңлаў емес, ал олардың арзыў-нийетлерин жүзеге шығарыў, потенциалын толық көрсетиўи ушын беккем тийкар жаратпақта.

Мине усындай ийгиликли илажлар шеңберинде Қарақалпақстан Республикасы Жоқарғы Кеңесиниң Баслығы Аманбай Орынбаев Шымбай районындағы бир қатар жумыссыз ҳәм аталыққа алынған жаслар менен ушырасыў өткерди.

Атап өтилгениндей, елимизде жасларды ҳәр тәреплеме қоллап-қуўатлаў мәмлекетлик сиясаттың баслы бағдарларының бири есапланады.

Өткерилген ушырасыўда бул бағдарда жасларға жаратылып атырған имканиятлар ҳаққында кең түрде атап өтилди. Соның менен бирге, усы имканиятлардан нәтийжели пайдаланып, ҳәр қыйлы бағдарларда жоқары нәтийжелерге ерисип атырған жаслардың қатары барған сайын кеңейип атырғаны айрықша тилге алынды.

Ушырасыў даўамында аймақ жаслары да белсендилик көрсетип, республикамыз басшысына өзлерин қызықтырып атырған мәселелер, турмыста ушырасып атырған машқалалар ҳәм алға қойылып атырған усыныс ҳәм басламаларын тиккелей билдирди.  Атап айтқанда, жумыс пенен тәмийинлеў, исбилерменликти жолға қойыў, жеңиллетилген кредитлерден пайдаланыў, кәсип-өнер үйрениў ҳәм билимлендириў тараўына тийсли мәселелер бойынша өзлериниң пикирлерин билдирди.

Ең әҳмийетлиси, ҳәр бир билдирилген мәселе Жоқарғы Кеңес баслығының жеке қадағалаўына алынып, тараў  жуўапкерлерине оларды қысқа мүддетлерде унамлы шешиў бойынша анық тапсырмалар берилди.

Ушырасыў даўамында спорттың пара жүзиў түри бойынша Жәҳән чемпионы болған Шахноза Ережепбаева мүнәсип хошаметленди.

Дерек: Қарақалпақстан Республикасы Жоқарғы Кеңесиниң Мәлимлеме хызмети

Қарақалпақстан хабар агентлиги