Өзбекстан Республикасы Президенти, Қураллы Күшлер Жоқарғы Бас Сәркардасы Шавкат Мирзиёев әскерий кадрлар таярлаў системасын жетилистириў ҳәм армияны санластырыў бойынша презентация менен танысты.

Соӊғы жыллары дүньяда жүз берип атырған қураллы келиспеўшиликлерде ушыўшысыз ушатуғын аппаратлар, роботластырылған системалар, радиоэлектрон гүрес қураллары ҳәм заманагөй басқарыў технологияларынан кеңнен пайдаланылмақта. Бул болса тек ғана қурал-жарақ ҳәм әскерий техникаларды жаңалаў емес, ал жаңа әўлад қәнигелерин таярлаўды да талап етпекте.

Елимизде бул бағдарда избе-из жумыслар әмелге асырылмақта. Әскерлерде дронларды жаўынгерлик қолланыў ҳәм оларға қарсы гүресиў бойынша жаңа бөлимлер шөлкемлестирилип, ушыўшысыз ушатуғын аппаратлардың операторлары, инженерлер ҳәм робототехника қәнигелерин таярлаў системасы жолға қойылды.

Презентацияда мәмлекетимиз басшысына усы мобиль бөлимлердиң жумысы ҳәм бул бағдарда қәнигелер таярлаў системасы бойынша есабат берилди.

Әскерий билимлендириў системасын реформалаў мәселелерине айрықша итибар қаратылды. 2025-жылы Президентимиздиң басламасы менен усы тараўды раўажландырыў, заманагөй билим ҳәм әмелий көнликпелерге ийе әскерий кадрларды таярлаў илажлары көрилди. Нәтийжеде барлық жоқары әскерий билимлендириў мәкемелерине институт статусы берилип, бирден-бир вертикал басқарыў системасы жаратылды, Өзбекстан Республикасы Әскерий қәўипсизлик ҳәм қорғаныў университети шөлкемлестирилди.

Заманагөй жаўынгерлик ҳәрекетлер, әскерлердеги реал талап ҳәм алдынғы жоқары билимлендириў мәкемелериниң тәжирийбеси тийкарында жаңа маманлық талаплары, оқыў режелери ҳәм бағдарламалары енгизилмекте. Таярлық теория ҳәм әмелиятты үйлестириў принципи тийкарында шөлкемлестирилип, болажақ офицерлер оқыў процесиниң өзинде әҳмийетли жағдайдан келип шығып хызмет өтеўи ушын зәрүр көнликпелерди ийелеўи нәзерде тутылған.

Бакалавр дәрежесинде әскерий кадрлар таярлаўдың пүткиллей жаңа модели шеңберинде курсантларға шет тиллер, мәлимлеме технологиялары ҳәм жасалма интеллект терең үйретиледи.

Сәркардалық-штаб офицерлери ушын алдынғы сырт ел тәжирийбеси ҳәм заманагөй қураллы соқлығысыўларды үйрениў тийкарында биринши мәрте үш басқышлы жаңа оқытыў системасы енгизиледи.

Соның менен бирге, сержантлар қурамын таярлаў көлеми де кеңейтиледи. Тийкарғы жаңалықлардан бири – жоқары әскерий билимлендириў мәкемелеринде сержантлар ушын бакалавриаттың алты пуқаралық қәнигелиги бойынша аралықтан билимлендириў жолға қойылады. Сондай-ақ, авиация ҳәм ушыўшысыз ушыў аппаратлары қәнигелерин таярлаў системасы және де жетилистирилип, бул бағдарда Қураллы Күшлер әскерий хызметкерлерин оқытыў ҳәм оларға бирден-бир сертификат бериў тәртиби енгизиледи.

Презентацияда армияны санластырыў ҳәм киберқәўипсизликти тәмийинлеў мәселелери де көрип шығылды.

Соӊғы жыллары Қорғаныў министрлиги системасында байланыс инфраструктурасы модернизацияланды, заманагөй мәлимлеме-коммуникация технологиялары енгизилмекте, қорғалған мағлыўмат алмасыў каналлары раўажландырылмақта.

Әскерий программистлер тәрепинен әскерлер жумысының түрли бағдарлары бойынша 50 ге шамалас мәлимлеме системалары ислеп шығылды. Атап айтқанда, қорғаныў ислери уйымларында “Шақырыў” электрон мәлимлеме системасы жаратылып, 19 министрлик ҳәм уйымлар менен интеграция етилди. Бул 39 түрдеги мағлыўматты онлайн түрде алыў ҳәм биринши мәрте шақырыў илажларын толық электрон түрде өткериў имканиятын берди.

Әскерий медицина тараўында бирден-бир медициналық мәлимлеме системасы ҳәм телемедицина енгизилип, Денсаўлықты сақлаў министрлигиниң “D-MED” системасы менен интеграция тәмийинленди.

Заманагөй қәўип-қәтерлерден келип шығып, Қорғаныў министрлигинде киберқәўиплерди өз ўақтында анықлаў ҳәм олардың алдын алыўға қаратылған Мәлимлеме қәўипсизлиги мониторинг орайы шөлкемлестирилди.

Презентацияда автоматластырылған басқарыў системаларын буннан былай да раўажландырыў, роботластырылған ҳәм автоном комплекслерден пайдаланыўды кеңейтиў, сондай-ақ, илимий-изертлеў ҳәм тәжирийбе-конструкторлық жумысларды жолға қойыў бойынша комплексли илажлар усыныс етилди.

Қорғаныў министрлигиниң орайлық аппаратында Санлы технологиялар бас басқармасы, Жасалма интеллект технологиялары департаменти ҳәм Киберқәўипсизлик лабораториясын шөлкемлестириў нәзерде тутылмақта. Республиканың барлық аймақларында үзликсиз ҳәм турақлы байланысты тәмийинлеў мақсетинде Жасалма жолдас байланыс орайының жумысы жолға қойылады.

Қорғаныў тараўында бирден-бир санлы сиясатты жүргизиў мақсетинде қорғаныў министриниң санластырыў, жасалма интеллект ҳәм киберқәўипсизлик бойынша орынбасары лаўазымы енгизилди.

Әскерий округлерде болса сәркардалардың санластырыў, жасалма интеллект ҳәм киберқәўипсизлик бойынша орынбасарлары лаўазымларын енгизиў нәзерде тутылмақта.

Презентация жуўмағында Жоқарғы Бас Сәркарда билдирилген усынысларды мақуллап, армияны және де санластырыў, әскерлерге заманагөй мәлимлеме-коммуникация системаларын ҳәм жасалма интеллект технологияларын енгизиўге қаратылған ҳүжжетлерге қол қойды.

Жуўапкерлер алдына қорғаныў тараўын толық санластырыў, миллий жасалма интеллект моделлерин жаратыў ҳәм маман әскерий кадрлар таярлаў системасын буннан былай да жетилистириў бойынша тийкарғы ўазыйпалар қойылды.

ӨзА