Чехия Республикасы Бас министри Андрей Бабиш 29-апрель күни рәсмий сапар менен мәмлекетимизге келди.

Жоқары мәртебели мийманды “Ташкент-Хумо” халықаралық аэропортында Өзбекстан Республикасы Бас министри Абдулла Арипов ҳәм басқа да рәсмийлер күтип алды.

Сапар бағдарламасына муўапық, Ташкент қаласында жоқары дәрежедеги сөйлесиўлер болып өтеди, көп қырлы Өзбекстан – Чехия бирге ислесиўин буннан былай да раўажландырыў перспективалары көрип шығылады.

Өз-ара саўданы көбейтиў, машина қурылысы, “жасыл” энергетика, химия, фармацевтика ҳәм транспорт тараўларында кооперацияны кеңейтиў дыққат орайында болады.

Мәдений-гуманитарлық ҳәм билимлендириў тараўларындағы бирге ислесиў мәселелери додаланады ҳәм өз-ара қоллап-қуўатлаў бойынша да пикир алысылады. Еки тәреплеме ҳүжжетлерге қол қойылыўы нәзерде тутылған.

Сапар етиў шеңберинде Бас министр Андрей Бабиш Өзбекстан – Чехия бизнес-форумында да қатнасады.

ӨзА