Нөкис қаласында 25-26-апрель күнлери футбол бойынша Өзбекстан Про-лигасында 5-туры шеңберинде еки ойын болып өтти.

Олардың биринде Нөкистиң «Арал» командасы Ферғана мәмлекетлик университетиниң «ФарДу» клубы менен өз-ара ойынға түсти. Оғада қызықлы өткен ойынның 9-минутында командамыз ағзасы Мырзабек Дәрьябаев «ФарДУ» дәрўазасын анық нышанға алып, есапты ашыўға еристи.

Буннан кейин еки команда да бир неше мәрте қәўипли ҳүжимлер шөлкемлестирген болса да, ушырасыўдың тийкарғы минутларын есап өзгермеди. Ал, төреши тәрепинен қосып берилген минутларда болса, Азизбек Бахрамов  «ФарДУ» дәрўазасына және бир мәрте гол урып, командамыздың ойындағы исенимли жеңисин тәмийинледи.

Ал, Бердақ атындағы Қарақалпақ мәмлекетлик университетиниң «ҚМУ» командасы болса, бул турда Термиз мәмлекетлик университетиниң «ТерДУ» клубы менен ушырасып, онда теңбе-тең ойнады. Есап 0:0.

Солай етип, Өзбекстан Про-лигасы 5-турынан соң Нағметулла Қутыбаев басшылығындағы «Арал» командасы Бекабадтың «Металлург» клубы менен биргеликте 13 упай топлап, турнир кестесинде жетекшилик етпекте. Келеси турда «Жайҳун» сапарда «Пахтакор-2» командасы менен ойнаса, «Арал» «Лочин» клубы менен өз-ара ойынға түседи.

Адилбай Оразов,

Қарақалпақстан хабар агентлиги шолыўшысы