Президент Шавкат Мирзиёев 23-апрель күни Ташкент қаласының Мырза Улығбек районына барып, район ҳәкимлигиниң жумысы, орынлардағы қурылыс ҳәм инфраструктураны раўажландырыў жумыслары менен танысты.

Бүгинги күнде Мырза Улығбек районы пайтахт экономикасын ҳәм илимий потенциалын белгилеўде стратегиялық әҳмийетке ийе. Жоқары экономикалық динамика ҳәм социаллық турақлылық районның заманагөй келбетин белгилеп бермекте. Аймақ экономикасының тийкарғы драйверлери сыпатында жедел раўажланып атырған хызмет көрсетиў тараўы ҳәм заманагөй технологиялық өндирис тармақлары жоқары нәтийжелиликти тәмийинлемекте.

Халықтың тығызлығы жоқары болған бул районда 342 мыңнан аслам пуқара жасайды. Аймақтағы 70 мәкан пуқаралар жыйыны арқалы социаллық басқарыўдың нәтийжели системасы жолға қойылған. Бул халық пенен мәнзилли ислесиў ҳәм бар мәселелерди жедел шешиў имканиятын береди.

Районның өзине тән тәрепи онда ири илимий-билимлендириў мәкемелериниң жәмленгенлигинде. Бул интеллектуаллық ресурс аймақты инновациялық экономикаға өтиўде беккем тийкар болып хызмет етпекте.

Мәмлекетимиз басшысы дәслеп Мырза Улығбек районы ҳәкимлиги имараты жанындағы Салар каналының үстине қурылған көпирди барып көрди, аймақтағы көклемзарластырыў жумысларын көзден өткерди ҳәм бул жерге нәл екти.

Буннан соң район ҳәкимлиги имаратында жаратылған шараятлар менен танысты.

Президентимиз 1992-1996-жыллары Мырза Улығбек районының ҳәкими лаўазымында жумыс алып барып, аймақты социаллық-экономикалық жақтан раўажландырыўға үлкен үлес қосты. Ҳәкимлик имаратында мәмлекетимиз басшысы ҳәким болып ислеген дәўирдеги көринисте қайта тикленген хызмет кабинети ҳәм хызмет автомобили көрсетилди. Мәмлекетимиз басшысы ҳәкимлиги ўақтында қабыл еткен ең әҳмийетли қарарлар көргизбеге қойылған. Танысыў ўақтында Президентимиз сол ўақыттағы жумысынан еске түсириўлери менен ортақласты.

Усы даўамында шекем Мырза Улығбек районында жәмийетлик қәўипсизлик, транспорт, социаллық жәрдем, коммунал, қаржы ҳәм банк сыяқлы 30 шөлкем өз бағдары бойынша өз алдына пытыраңқы ҳалда жумыс ислеп атырған еди. Бирден-бир системаның жоқ екенлиги халықтың мүрәжатын жеделлик пенен шешиўге үлкен тосқынлық етип атырған, артықша ўақыт ҳәм сергизданлыққа себеп болатуғын еди.

Ҳәзир ҳәкимликте жағдайлар орайы шөлкемлестирилип, жасалма интеллект тийкарында таллаў, машқалаларды жедел анықлаў ҳәм шешиў бойынша “Ақыллы район” платформасы жаратылды. Әҳмийетлиси, райондағы барлық мәҳәлле ўәкиллери менен онлайн сөйлесиў, жағдайдан турақлы хабардар болыў имканияты жаратылған.

Бул жерде социаллық ҳәм коммуналлық машқалалар мониторинг етиледи, халықтың мүрәжатларының орынланыўы қадағалаўға алынады, айрықша жағдайларда тийисли хызметлердиң жумысы оператив басқарылады ҳәм муўапықластырылады.

Платформа қурамындағы “Қәўипсиз район” системасы ҳуқықбузарлықларды мониторинг етиў ҳәм жәмийетлик қәўипсизликти тәмийинлеўге хызмет етеди. Исбилерменлик субъектлериниң санлы картасы жасалма интеллект анализи тийкарында салық түсимлерин прогнозлаў ҳәм олардың жыйналыўын тәмийинлеўге қаратылған. “AI Davomat” системасы болса мектеплерде себепсиз сабақ қалдырыў жағдайларын сапластырыў, жас өспиримлер арасында қадағалаўсызлықтың алдын алыўда айрықша әҳмийетке ийе.

Бундай платформалар Чиланзар, Шайхонтоҳур ҳәм Алмазар районларында да иске қосылды.

Президентимиз жағдайлар орайының жумысы менен танысып, бул жаңа системаны пайтахтымыздың қалған районларында да енгизиўге тапсырма берди. Барлық ўәлаят ҳәкимлери, прокурорлары, ишки ислер, қәўипсизлик ҳәм салық уйымларының басшылары Мырза Улығбек районына келип, бул жаңа системаны үйрениўи зәрүр екенлиги көрсетип өтилди.

Буннан соң Президент Шавкат Мирзиёев Мырза Улығбек районындағы Өзбекстан ҳаўазы көшесинде шөлкемлестирилген гастрономиялық туризм көшесиниң жумысы менен танысты.

Туризм аз қаржы есабынан көп жумыс орнын жарататуғын, халықтың дәраматларын арттырып, аймақлардың көринисин жақсылатуғын әҳмийетли тараў болып есапланады. Ташкент қаласында бул бағдарда имканиятлар үлкен.

Атап айтқанда, Мырза Улығбек районында бул потенциалдан толық пайдаланыў мақсетинде бир қатар жойбарлар әмелге асырылмақта.

Өзбекстан ҳаўазы көшесинде алып барылған дөретиўшилик ҳәм абаданластырыў жумыслары мәмлекетимизде туризм ҳәм сервис тараўларын раўажландырыўға қаратылып атырған айрықша итибардың әмелий көриниси болды.

Бул жойбар мәмлекетимиз басшысының 2022-жыл 30-апрельде қабыл етилген “Ишки туризм хызметлерин диверсификациялаўға байланыслы қосымша илажлар ҳаққында”ғы қарары тийкарында әмелге асырылған.

Объект 2025-жыл сентябрь айында иске қосылған болып, жойбары Россияның “City Makers” ҳәм “Люди Архитектс” бюролары тәрепинен ислеп шығылған.

Көшениң улыўма узынлығы 2,1 километрди қурайды. Бул жерде заманагөй инфраструктура жаратылған. Соның ишинде, кең пиядалар ҳәм велосипед жоллары қурылған, халық ҳәм туристлер ушын қолайлы шараятлар жаратылған.

Аймақта селфи зоналар, ашық ҳаўадағы спорт майданшалары шөлкемлестирилип, шаңарақлық дем алыў орынлары, балалар ушын экомайданшалар ҳәм арқанлы бағ жумыс алып бармақта.

Мәмлекетимиз басшысы көше бойлап жүрип, заманагөй усылда оңланған турақ жайлар, абат көшелер ҳәм халық ушын жаратылған шараятларды көзден өткерди. Усы жерде жасап атырған шаңарақлар менен қызғын сәўбетлести.

Жойбардың улыўма баҳасы 40 миллиард сумды қурайды. Көшеде жәми 165 саўда объекти жумыс алып бармақта. 89 исбилерменлик субъекти үзликсиз ислеў тәртибине өткен. Сондай-ақ, 2 мың 221 жаңа жумыс орны жаратылған.

Президентимизге усы жердиң өзинде Ташкент қаласында жумыс алып барып атырған туризм ҳәм гастрономиялық көшелерде әмелге асырылған жумыслар бойынша мәлимлеме берилди.

Атап өтилгениндей, 2025-жылы пайтахтта жәми 26 көше күни-түни жумыс ислеўге өтти. Бул бағдарға 540 миллиард сум қаржы қаратылды. Нәтийжеде 1 мың 103 жаңа саўда ҳәм сервис объекти шөлкемлестирилип, 315 исбилерменлик субъекти 24/7 режиминде ислеўди баслады, 26 сырт ел брендиниң жумысы жолға қойылды.

Әмелге асырылған жумыслар экономикалық көрсеткишлерге де унамлы тәсир көрсеткен. Көшелерде түрли хызметлерден пайдаланыўшылар суткасына 80 мыңнан 200 мыңға жеткен, 6 мың халықтың бәнтлиги тәмийинленген.

Усы жылы және 18 жаңа туризм көшесин шөлкемлестириў, 500 жаңа объектти иске қосыў ҳәм 7 мыңға шекем жаңа жумыс орнын жаратыў режелери ҳаққында мағлыўмат берилди.

Президентимиз Мырза Улығбек районында гастрономиялық туризм көшелериниң санын және де көбейтиў, бар имканиятларды толық иске қосыў, хызметлердиң сапасын арттырыў ҳәм жаңа инвестициялық жойбарларды әмелге асырыў бойынша жуўапкерлерге анық тапсырмалар берди.

Буннан соң Президент Шавкат Мирзиёев Ташкент қаласы Мырза Улығбек районында жаңадан қурылған “Pavilion” саўда комплексин барып көрди.

Соңғы жыллары елимизде қурылыс материаллары санааты жедел раўажланып, тармақта өндирис пенен бирге саўда ҳәм сервис инфраструктурасын заманагөй тийкарда шөлкемлестириўге де айрықша итибар қаратылмақта.

Бул комплекс мине усындай қатнастың әмелий көриниси болды. Исбилермен инвестор тәрепинен жойбарға 25 миллион доллар инвестиция қаратылған. Комплекс 4,6 гектар аймақта қурылған болып, 42 мың квадрат метр қурылыс жумыслары орынланған. Аймақта 1 мың орынлық автомобиль туратуғын орын да шөлкемлестирилген.

Үш қабатлы комплексте саўда дүкәнлары менен бирге кең жоллар, ашық ҳәм қолайлы жәмийетлик майданлар, қарыйдарлар ушын заманагөй шараят жаратылған. Ең әҳмийетлиси, бул жерде қурылыс материаллары саўдасын пытыраңқы ҳәм тығылыс түринен шығарып, тәртипли, ашық-айдын ҳәм қарыйдарларға қолайлы система тийкарында жолға қойыў нәзерде тутылған.

Жойбардың және бир әҳмийетли тәрепи сонда, 2 мың халық жумыс пенен тәмийинленди.

Мәмлекетимиз басшысына комплекстиң жумысы ҳәм имканиятлары ҳаққында мәлимлеме берилди. Президентимиз қурылыс өнимлери дүкәнларын көзден өткерди.

Бул жерде 500 дүкәндағы қурылыс ҳәм оңлаў ушын зәрүр өнимлерди бир жерде усыныс етиў имканияты жаратылады. Барлық өнимлер ҳәм олардың баҳасы бирден-бир электрон платформа арқалы ашық көринип турады. Бул болса ҳәм исбилерменлер, ҳәм қарыйдарлар ушын ўақыт, қаржы ҳәм таңлаў имканияты көзқарасынан үлкен қолайлық жаратады.

Комплекс жылына 3 миллионға шекем қарыйдарға хызмет көрсетиў қуўатлылығына ийе болады.

Аймақта қәўипсизлик мәселелерине де айрықша итибар қаратылған. Пүткил саўда комплекси 500 заманагөй бақлаў камерасы менен қамтып алынған.

Президентимиз бул комплекс тек ғана саўда орынларының топламы емес, ал қурылыс материаллары базарында жаңа мәденият, жаңа сапа ҳәм жаңа хызмет стандартларын қәлиплестиретуғын орын болыўы керек екенлигин атап өтти.

Ташкенттиң тарийхый он еки дәрўазасы болғанын еслетип, бүгин пайтахт әтирапында да усындай, ҳәр қыйлы бағдарларға қәнигелескен заманагөй саўда орайларын көбейтиў зәрүр екенлиги атап өтилди.

– Халқымыздың турмыс тәризи жақсыланып, қәлеўлери артып атыр. Бундай саўда комплекслеринде миллий өнимлеримизге көбирек орын бериў, жергиликли ислеп шығарыўшыларды тартыў ҳәм логистиканы дурыс жолға қойыў зәрүр, – деди Президент Шавкат Мирзиёев.

Мәмлекетимиз басшысы Мырза Улығбек районындағы Боғимайдон мәҳәллесинде әмелге асырылған дөретиўшилик жумыслары менен де танысты.

Елимизде мәҳәллелердиң инфраструктурасын жетилистириў, оларға Жаңа Өзбекстан келбетин алып кириў ҳәм халық ушын мүнәсип жасаў орталығын жаратыў тийкарғы ўазыйпалардан бири етип белгиленген.

Бул бағдарда 2026-жыл 16-февральда қабыл етилген “Мәҳәллени раўажландырыў ҳәм жәмийетти илгерилетиў” жылы Мәмлекетлик бағдарламасы мәҳәллелерди заманагөй тийкарда раўажландырыў, олардың социаллық ҳәм экономикалық потенциалын арттырыўда әҳмийетли қолланба болмақта.

Пайтахтымыздың Мырза Улығбек районындағы Боғимайдон мәҳәллеси бүгин мине усындай жаңаланыўлар нәтийжесинде пүткиллей жаңаша көриниске ийе болған. 1987-жылы шөлкемлестирилген бул мәҳәлледе ҳәзирги ўақытта 41 көп қабатлы турақ жай, 1 мың 990 шаңарақ болып, дерлик 5,5 мың халық жасайды.

Аймақта халық ушын заманагөй инфраструктура жаратылған. Атап айтқанда, бул жерде 20 балалар ойын майданы, 11 воркаут майданшасы, 3 мини-футбол майданы ҳәм теннис корты шөлкемлестирилген. 2 мектепке шекемги билимлендириў шөлкеми дерлик 500 баланы қамтып алған.

Мәҳәлледе экономикалық белсендиликти арттырыў ҳәм халықтың бәнтлигин тәмийинлеўге де айрықша итибар қаратылған. Бүгин бул жерде 70 тен аслам исбилерменлик субъекти жумыс алып бармақта. Бул болса жумыссызлықты қысқартыў ҳәм шаңарақлардың дәраматын арттырыўға хызмет етпекте. Соның ишинде, мәҳәлледеги 1 мың 48 жастан 949 ының бәнтлиги тәмийинленген.

Аймақта жасыл тоғайды сақлаў ҳәм көбейтиўге де итибар күшейтилген. Усы мақсетте 2022-жылы экобағ шөлкемлестирилген. Дерлик 4,5 мың түп терекке ийе бул бағ бүгин кекселер менен жаслардың сүйикли дем алыў орнына айланған.

Сондай-ақ, мәҳәлледе социаллық орталықты беккемлеўге хызмет етип атырған “Нураныйлар мәканы” да жумыс алып бармақта.

Мәмлекетимиз басшысы мәҳәлледе қәўипсиз орталықты тәмийинлеў бойынша әмелге асырылып атырған жумыслардың презентациясы менен танысты. Бүгин турақ жайлардың кириў бөлимлери бақлаў камералары ҳәм қорғаў пультлери менен үскенеленген. Аймаққа кирип-шығып атырған шахслар ҳәм автотранспорт қураллары заманагөй технологиялар тийкарында қадағалап барылмақта.

Президентимиз халық ушын жаратылған шараятларды көзден өткерип, мәҳәлле ақсақаллары ҳәм белсендилери менен сөйлести. Абат ҳәм пайызлы мәҳәлле жәмийеттиң таянышы екенин, тынышлық, аўызбиршилик ҳәм социаллық тилеклесликти беккемлеў бәрқулла тийкарғы ўазыйпа болып қалатуғынын атап өтти.

Мәмлекетимиз басшысы мәҳәлледе шөлкемлестирилген сүмелек сейилинде қатнасып, мәҳәлле халқы ҳәм балалар менен сәўбетлести. Сондай-ақ, спорт майданшасында шынығып атырған жаслар менен ушырасып, физикалық тәрбия ҳәм саламат турмыс тәризиниң бәркамал инсан болып камалға келиўиндеги әҳмийетине айрықша тоқтап өтти.

 

Зиёдулла ЖОНИБЕКОВ,

Икром АВВАЛБОЕВ,

Абдулазиз РУСТАМОВ,

Беҳруз ХУДОЙБЕРДИЕВ,

ӨзАның хабаршылары