Мәмлекетимизде сапар менен болып турған Россия Федерациясы Администрациясы басшысының биринши орынбасары Сергей Кириенко басшылығындағы делегация Өзбекстандағы Ислам цивилизациясы орайында болды.

Делегация ўәкиллери дәслеп миллий архитектуралық усылда бой тиклеген комплекстиң заманагөй имаратлар технологиясы менен таныстырылды.

Сондай-ақ, “Исламға шекемги цивилизациялар”, “Биринши Ренессанс”,  “Екинши Ренессанс” ҳәм “Жаңа Өзбекстан – Жаңа Ренессанс” экспозициялары көзден өткерилди.

Уллы ойшылларымыздың мийрасы, саманийлер, қараханийлер, хорезмшаҳлар ҳәм темурийлер дәўирлерине байланыслы бийбаҳа қолжазбалар да көрсетилди.

Мәмлекетимиз басшысының басламасы менен қурылған комплекс халықаралық илимий-изертлеў, билимлендириў ҳәм мәдений бирге ислесиў ушын жаңа имканиятлар жаратпақта.

Мәмлекетлераралық мәдений қарым-қатнас ҳәм руўхый жақынлықты беккемлеп, глобаллық шараятта халықаралық бирге ислесиўди күшейтиўде Ислам цивилизациясы орайының орны шексиз екени атап өтилди.

Жоқары мәртебели мийман Ислам цивилизациясы орайының ҳүрметли мийманлар китабына өз пикирлерин жазып қалдырды.

Өзбекстанда әмелге асырылып атырған кең көлемли реформалардың нәтийжесин және бир мәрте көрсетип атырған Ислам цивилизациясы орайы Россия делегациясында үлкен тәсир қалдырды.

Абдулазиз РУСТАМОВ, Фарҳод АБДУРАСУЛОВ(фото), ӨзА