Өзбекстан мусылманлары басқармасы баслығы, муфтий Шайх Нуриддин Холиқназардың басламасы менен барлық миллий спорт түрлерин кеңнен ен жайдырыў, саламат турмыс тәризин қәлиплестириў, әсиресе жаслар арасында саламат турмыс тәризин үгит-нәсиятлаў, миллий қәдириятларға болған қызығыўшылықты арттырыў мақсетинде миллий гүрес бойынша диний тараў ўәкиллери арасында жарыс өткерилди.

Бүгин, Нөкис қаласындағы спорт комплексинде Қарақалпақстан мусылманлары қазыятына қараслы мешит имам-хатиб ҳәм имам-найыплары арасында салмақ категорияларына қарап, миллий гүрес бойынша өз ара күш сынасты.

Жарыс нәтийжелерине бола, 35-45 жас аралығында Нөкис қаласы «Имам ийшан Муҳаммад» жоме мешити имам-найыбы Ф.Мансуров, Нөкис қаласы «Шайх Муҳаммад Садық Муҳаммад Юсуф» жоме мешити имам-найыбы Т.Сарсенбаев, Мойнақ районы «Ҳәким ата» жоме мешити имам-хатиби А.Сейдуллаев, Қанлыкөл районы «Ешим ахун» жоме мешити имам-найыбы А.Наимов, Қанлыкөл районы «Атажан хожа» жоме мешити имам-найыбы Р.Баймуратовлар, 45-50 жас аралығында болса, Тақыятас районы «Сары ийшан» жоме мешити имам-хатиби Р.Омирзақов ҳәм 50 жастан жоқары болған қатнасыўшылар арасынан Нөкис районы «Имаматдин ийшан» жоме мешити имам-найыбы Х.Омирзақовлар жеңимпаз деп табылып, кейинги басқышларда қатнасыў ҳуқықын қолға киргизди.

Қарақалпақстан хабар агентлиги