Президент Шавкат Мирзиёевқа 2026-жылдың биринши шерегинде экономикалық көрсеткишлер прогнозын тәмийинлеў ҳәм дүнья базарындағы турақсыз жағдайдың миллий экономикаға унамсыз тәсирин азайтыў бойынша мәлимлеме берилди.

Усы жылдың биринши еки айында санаат 7,7 процентке, хызметлер 15,4 процентке өсти, 3,5 миллиард долларлық экспорт әмелге асырылды ҳәм 8,3 миллиард доллар сырт ел инвестициясы тартылды.

Жыл басынан 9 ўәлаятты социаллық-экономикалық раўажландырыўға республикалық бюджеттен қосымша 2,3 триллион сум ҳәм 500 миллион доллар қаржы қаратылды. “Жаңа Өзбекстан келбети” статусы берилген 33 район ҳәм 330 мәҳәлле ушын жергиликли бюджетлерге 3,9 триллион сум ажыратылды. Аўыр категориядағы 37 район ҳәм 903 мәҳәллеге жәми 3,9 триллион сум және жергиликли бюджетлерден 1,3 триллион сум, 283 “драйвер” жойбарларға биринши басқышта 1 триллион сум ажыратылды.

Жыл соңына шекем ғалабалық көшелер, жағалық ҳәм жол бойы инфраструктура жойбарларын әмелге асырыў ушын жәми 1,2 триллион сум, туризм потенциалы жоқары болған 150 мәҳәлле инфраструктурасын жақсылаў ушын 450 миллиард сум, 400 мәҳәлледе 50 микро санаат орайларын шөлкемлестириў ушын 150 миллиард сум қаржы қаратылады.

Соның менен бирге, қысқа ўақыт ишинде дүньядағы жағдай кескин өзгерип, экономика тармақларының турақлылығы, сыртқы саўда жоллары ҳәм импорт баҳаларына қосымша басым жүзеге келтирип атырғаны атап өтилди. Бундай шараятта ҳәр бир тармақ ҳәм аймақ басшысы жағдайды алдыннан баҳалап, ҳәр қыйлы сценарийлер тийкарында проактив ислеўи зәрүр екенлиги көрсетип өтилди.

Инфляцияны быйылғы жылы 6-6,5 процент шеңберинде сақлап қалыў ең әҳмийетли ўазыйпалардан бири екенине айрықша итибар қаратылды.

Атап айтқанда, дүнья базарында нефть баҳасының кескин қымбатлаўы транспорт ҳәм нефть-химия өнимлериниң өзине түсер баҳасына тәсир көрсетип атырғаны, полиэтилен ҳәм полипропилен баҳаларында да өсиў бақланып атырғаны айтылды. Сол себепли, тийкарғы түрдеги азық-аўқат өнимлериниң импорты, транспорт-логистика мәселелери ҳәм альтернатив коридорлардан пайдаланыў бойынша жедел илажлар көриў ўазыйпасы қойылды.

Буннан тысқары, исбилерменлердиң шийки зат, базар ҳәм кредит пенен байланыслы машқалаларын ҳәзирден-ақ шешиў әҳмийетли екенлиги атап өтилди.

Экспортшылар тәрепинен көтерилип атырған тийкарғы мәселелерден бири транспорт-логистика екени, дүньяда жүз берип атырған ўақыялар тәсиринде экспорт жүк тасыўларында үзилислер ҳәм қымбатлаў айрықша қәўетер оятып атырғаны атап өтилди.

Усы мүнәсибет пенен қоңсы мәмлекетлер менен транспорт ҳәм саўда мәселелери бойынша тығыз бирге ислесиўди күшейтиў, азық-аўқат өнимлерин авиатранспорт арқалы экспорт етиў ҳәм исбилерменлер ушын арзанластырылған тарифлерди енгизиў илажларын көриў тапсырылды.

Сырт ел инвестициялары мәселеси де ҳәр тәреплеме көрип шығылды. Қәўипли халықаралық жағдай айырым жойбарлардың орынланыўына тәсир көрсетиўи мүмкин екени билдирилди. Усы мүнәсибет пенен әмелге асырылып атырған ҳәр бир жойбарды турақлы таллап барыў ҳәм инвесторлар менен күнлик қарым-қатнас орнатыў ўазыйпасы белгиленди.

Банк-қаржы тараўында бизнести қоллап-қуўатлаў ушын ажыратылып атырған кредитлердиң динамикасы да көрип шығылды.

Мәмлекетимиз басшысы ҳәзирги санлар унамлы болыўына қарамастан, ҳеш бир басшы қәтиржәм болыўы мүмкин емес екенлигин атап өтти. Ҳәзирги қыйын жағдайда қәўип-қәтерлерди алдыннан көре билиў, оларды жумсартыў бойынша анық режелер менен ислесиў, тармақлар ҳәм аймақларда машқалаларды күтип отырмастан, оларға жедел шешим табыў зәрүр екенлиги көрсетип өтилди.

Жуўапкерлерге инфляцияны жылаўлаў, санаат ҳәм экспорт көрсеткишлерин тәмийинлеў, инвестициялық жойбарларды жеделлестириў, банк системасы ҳәм қурылыс бағдарламаларындағы машқалаларды сапластырыў бойынша анық тапсырмалар берилди.

ӨзА