Улыўмахалықлық Наўрыз байрамына бағышланып, 2013-2014 жыллары туўылған киши өспиримлер ҳәм қызлар арасында Өзбекстан Мәденият спорт ҳәм туризм хызметкерлери кәсиплик аўқамы Қарақалпақстан Республикасы бирлескен комитети ҳәм Нөкис қаласы кураш шеберлик мектебиниң ашық бириншилиги болып өтти.

Жарысқа Нөкис қаласы, Кегейли, Бозатаў, Шоманай,Қанлыкөл, Әмиўдәрья ҳәм Төрткүл районларынан жас палўанлар қатнасып жеңимпазлық ушын өз-ара беллести.

Ул балалар 5, қызлар 4 салмақ категориясы бойынша жарысқа түскен беллесиўлер соңында 33 кг салмақ категориясында қанлыкөлли Ақылбек Көбейсинов, 40 кг да әмиўдәрьялы Фаррух Озодбоев , 48 ҳәм 56 кг да нөкисли Ислам Қыдырниязов пенен Айбек Генжебаев, +65 кг да әмиўдәрьялы Умиджан Алламбергеновлар биринши орынды ийелеўге миясар болды.

Ал, қызлар арасында болса, 30 кг да Әмиўдәрья районынан Умида Садуллаева, 36 кг да төрткүлли Нурана Атабаева, 52 кг да шоманайлы Азада Шарибаева ҳәм +52 кг да Нөкис қаласынан Айгера Қурақовалар кубок жеңимпазына айланды.

Өткерилген жарыс соңында жеңимпазлар Өзбекстан Мәденият спорт ҳәм туризм хызметкерлери кәсиплик аўқамы Қарақалпақстан Республикаси бирлескен комитети ҳәм Нөкис қаласи кураш шеберлик мектеби тәрепинен таярланған диплом, медаль ҳәм баҳали саўғалар менен сыйлықланды.

Адилбай Оразов,

Қарақалпақстан хабар агентлиги шолыўшысы
М.Ҳабибуллаевтың түсирген сүўретлери.