Өзбекстан Республикасы Президенти Шавкат Мирзиёевтиң мирәт етиўине бола Тәжикстан Республикасы Президенти Эмомали Раҳмон 26-27-март күнлери мәмлекетлик сапар менен елимизде болады.

Сапар етиў шеңберинде жоқары дәрежедеги сөйлесиўлер және Өзбекстан ҳәм Тәжикстан жетекшилериниң басшылығында Жоқары мәмлекетлераралық кеңестиң биринши мәжилиси болып өтеди.

Болажақ илажлардың күн тәртибинен Өзбекстан – Тәжикстан дослық ҳәм жақсы қоңсышылық, стратегиялық шериклик ҳәм аўқамласлық қатнасықларын және де беккемлеў мәселелери орын алған.

Сиясий сөйлесиўди беккемлеў, саўда-экономикалық ҳәм аймақлараралық бирге ислесиўди кеңейтиў, санаат кооперациясы ҳәм транспорт тараўында өз-ара байланыслылықты раўажландырыў, суў ҳәм энергетика қәўипсизлигин тәмийинлеў және кең көлемли мәдений-гуманитарлық алмасыўларды даўам еттириўге айрықша итибар қаратылады.

Мәмлекет басшылары халықаралық ҳәм регионаллық әҳмийеттеги мәселелер және көп тәреплеме форматлар шеңбериндеги бирге ислесиў бойынша пикир алысады.

Сондай-ақ, бир қатар жаңа қоспа жойбарларды иске қосыў нәзерде тутылған, көп тәреплеме бирге ислесиўди буннан былай да раўажландырыўға қаратылған еки тәреплеме ҳүжжетлердиң салмақлы топламына қол қойылыўы режелестирилген.

ӨзА