Prezident Shavkat Mirziyoev 19-mart kúni Samarqand wálayatı Payariq rayonında qaytadan qurılǵan Imam Buxariy kompleksine bardı.
Zıyarat etiw orayınıń dál ortasında ullı hádistanıwshı babamızdıń teberik mavzoleyi orın alǵan.
Mámleketimiz basshısı maqbaranı zıyarat etti. Quran oqılıp, pátiya etildi.
– Múbárek Ramazan hayıtı qarsańında ullı watanlasımız, hádis iliminiń sultanı Imam Buxariy háziretleriniń ruwxına jáne bir márte húrmet-izzet kórsetpektemiz. Buxariy babamız Quranı kárimnen keyingi eń abıraylı derek bolǵan hádisler kitabın jaratıp, pútkil islam áleminde dańqqa erisken ullı tulǵa bolıp esaplanadı. Muqaddes jerimiz dúnyaǵa mine usınday belgili ilimpazdı bergeni menen hár qansha maqtansaq arzıydı.
El-jurtımızdıń pidákerlik miyneti menen búgin arzıw-nietlerimiz ámelge astı. Bul biytákirar zıyarat etiw ornın Imam Buxariy babamızdıń dúnyaǵa belgili abırayına, joqarı statusına múnásip dárejede qurıwǵa miyasar boldıq. Mine, usınday teberik orın barshemizge mubárek bolsın, – dedi mámleketimiz basshısı.
ÓzA