Президент Шавкат Мирзиёев Қашқадәрья ўәлаятында реформалардың нәтийжелилиги ҳәм келешекте әмелге асырылыўы керек болған тийкарғы ўазыйпалар бойынша мәжилис өткерди.

Қашқадәрья өзиниң үлкен аймағы, бай тәбийғый ресурслары, раўажланған санааты, мийнеткеш ҳәм исбилермен халқы менен үлкен потенциалға ийе екени атап өтилди.

Өткен жылы жалпы аймақлық өнимде 6,8 процент, санаатта 7,2 процент, хызметлер тараўында 13,6 процент, аўыл хожалығында 4,3 процентлик өсиў жүз берди. 2017-2025-жылларда халықтың жан басына жалпы аймақлық өнимниң көлеми 3,2 есеге өсип, 26,9 миллион сумға жетти. Жумыссызлық ҳәм кәмбағаллық дәрежеси сәйкес түрде 4,9 ҳәм 6,5 процентке түсти.

2026-жылы экономика тармақларында жаңа жойбарларды әмелге асырыў есабынан санаатта 8,6 процентлик өсиўди тәмийинлеў, 3,5 миллиард доллар инвестиция есабынан 727 миллион долларлық өним экспорт етиў режелестирилгени атап өтилди. Нәтийжеде ўәлаят экономикасы 8,2 процентке, хызметлер 15,9 процентке, қурылыс 13,2 процентке, аўыл хожалығы 5,8 процентке өсиўи күтилмекте.

Санаатта 1,7 миллиард долларлық 195 жойбарды иске қосыў, өндирис қуўатлықларын кеңейтиў ҳәм микро санаат орайларын шөлкемлестириў арқалы тармақларда жоқары өсиў пәтлерин тәмийинлеў зәрүр екенлиги атап өтилди.

Ўәлаятта бир қатар ири санаат жойбарларын әмелге асырыў режелери ҳаққында мәлимлеме берилди. Соның ишинде, гезлеме, кийим-кеншек ҳәм гигиеналық қураллар, аўыл хожалығы техникасы ҳәм үскенелери, электромобильлер ушын қуўатландырыў станциялары, фиброцемент панельлер ҳәм дийўал плиталарын ислеп шығарыў қуўатлықларын шөлкемлестириў нәзерде тутылған.

Сондай-ақ, Мүбәрек арнаўлы инновациялық санаат зонасын ҳәм Қаршы жасыл технологиялар санаат зонасын шөлкемлестирип, 2026-2027-жылларда оларда 1,1 миллиард доллардан аслам болған 36 жойбарды әмелге асырыў ҳәм 6 мыңға шамалас жаңа жумыс орнын жаратыў режелестирилген.

Жаңа көзқараслар тийкарында мәҳәллелерди терең ҳәм орта қәнигелестириў, жеңиллетилген кредит ҳәм субсидиялар ажыратыў есабынан кәмбағаллықты қысқартыў зәрүр екенлиги көрсетип өтилди. Атап айтқанда, мәҳәллелерде 820 миллиард сумлық кредитлер, 52,3 миллиард сумлық ссуда ҳәм субсидиялар ажыратыў, өзин-өзи бәнт еткенлерди қоллап-қуўатлаў арқалы 48 мың исбилерменлик субъекти шөлкемлестириледи, 31 мың микрожойбар әмелге асырылады.

Нәтийжеде 2026-жылдың ақырына шекем жумыссызлықты 3,2 процентке, кәмбағаллықты 3 процентке түсириў, онда Ғузар, Қамаши, Көкдала, Миришкор, Шаҳрисабз ҳәм Яккабағ районларын кәмбағаллық ҳәм жумыссызлықтан жырақ аймаққа айландырыў мақсет етилген.

Дүньяда гөш баҳалары артып баратырған ҳәзирги шараятта ўәлаятта шарўашылық ҳәм от-жем базасын беккемлеў, жайлаў жерлеринен үнемли пайдаланыў бойынша жаңа система енгизилип атырғаны атап өтилди.

Онда 2030-жылға шекем 200 мың гектар, соның ишинде, 2026-жылы 15 мың гектар жерди өзлестириў, инфраструктура менен тәмийинлеў арқалы азықлық егинлер, картошка, овощ, собықлы ҳәм майлы өсимликлер жетистириў көлемлерин арттырыў ўазыйпасы қойылды.

Усы жылы ғәлле зүрәәтлилигин орташа 84,8 центнерге, пахта зүрәәтлилигин 47,5 центнерге, картошка зүрәәтлилигин 175 центнерге шекем арттырыў режелестирилген. Сондай-ақ, 48 ғәлле комбайны, 272 шигит егиў сеялкасын сатып алыў, суўды үнемлейтуғын технологияларды ҳәм заманагөй агротехнологияларды енгизиў есабынан аўыл хожалығында дәраматты 20-35 процентке арттырыў имканияты бар екенлиги көрсетип өтилди.

Суў тәмийнаты Қашқадәрья ушын ең аўыр мәселелерден екени атап өтилди.

Егинлердиң үлкен бөлеги насос арқалы суўғарылатуғын шараятта 2026-жылы 320 километр магистраль ҳәм 3,3 мың километр ишки каналларды бетонлаў, 70,6 мың гектарда суўды үнемлейтуғын технологияларды енгизиў, 27,4 мың гектарда лазерли тегислеў жумысларын әмелге асырыў және 16 насос станциясын модернизациялаў ўазыйпалары белгиленди. Бул арқалы 800 миллион куб метрге шекем суў үнемлениўи күтилмекте.

Ишимлик суўы тәмийнатын жақсылаў мақсетинде Ҳисорак суў сақлағышынан Қаршы қаласына суў тартыў жойбары ислеп шығылып атырғаны мәлим етилди. Бул жойбар шеңберинде 16 ишимлик суўы объекти ҳәм 416 километр тармақ қурылады. Қаршы ҳәм Шаҳрисабз қалалары, Дийқанабад ҳәм Қамаши районларындағы канализация тармақлары реконструкцияланады.

Туризм потенциалын толық иске қосыў бойынша жылына 1 миллион туристти тартып атырған Мираки қалашасыныӊ тәжирийбеси тийкарында жаңа жойбарларды қалған районларда да кеңейтиў зәрүр екенлиги атап өтилди.

Қамаши районында “Майданак” бийик таў туризм орайын шөлкемлестириў, Шаҳрисабз районында бир ўақыттың өзинде 13 мың саяхатшыға хызмет көрсететуғын “Ғелон” халықаралық улыўма мәўсимлик курортын қурыў, Яккабоғ районы Татар аўылында туризмди раўажландырыў, Ҳәзирети Султан шоққысы аймағында трекинг бағдарлары ҳәм шатырлы үйлер дем алыў орнын шөлкемлестириў жойбарлары усылардың қатарына киреди.

Улыўма, усы жылы 45 мийманхана ҳәм мийман үйи шөлкемлестирилип, қосымша 1130 орын жаратылатуғыны белгиленди.

Ўәлаятта жол, турақ жай ҳәм инженерлик-коммуникация инфраструктурасын жақсылаў бойынша да анық бағдарламалар додаланды. “Жаңа Өзбекстан” көринисиндеги 2 район ҳәм 46 мәҳәлледе, сондай-ақ, аўыр категориядағы 3 район ҳәм 108 мәҳәлледе ишки жоллар, суў тәмийнаты, суўғарыў инфраструктурасы және электр тармақларын жақсылаў ушын жәми 864 миллиард сум қаржы қаратылатуғыны белгиленди.

Социаллық бағдарда шаңарақ ҳәм ҳаял-қызларды қоллап-қуўатлаў, денсаўлықты сақлаў системасын раўажландырыў бойынша көрсеткишлер белгиленди. Соның ишинде, жаңа мәмлекетлик ҳәм жеке меншик бақша, мектеплер шөлкемлестириў, 120 мың ҳаял-қызлардың бәнтлигин тәмийинлеў, 21,1 мыңын кәсип-өнер ҳәм исбилерменликке оқытыў, “Ҳаял-қызлар дәптери” арқалы 102 мыңға жәрдем көрсетиў илажлары нәзерде тутылған.

Германия менен биргеликте тәртипли мийнет миграциясы ҳәм кәсиплик таярлаў бойынша жаңа басламалар усынылды. 2026-жылы 3000, 2027-жылы 5000 жасты Германияға жумысқа бағдарлаў, оларды оқытыў ушын Қаршы қаласында Билимлендириў ҳәм технологиялар орайын ашыў режелестирилген.

Мәжилис жуўмағында мәмлекетимиз басшысы белгиленген ўазыйпалардың орынланыўын қатаң қадағалаўға алыў, инвестиция ҳәм экспорт көрсеткишлерин тәмийинлеў, жаңа жумыс орынларын жаратыў және халықтың турмыс дәрежесин арттырыў бойынша жуўапкерлерге анық тапсырмалар берди.

ӨзА