Президент Шавкат Мирзиёев транспорт инфраструктурасын модернизациялаўға қаратылған ири жойбарлар шеңберинде алып барылып атырған жумыслар бойынша презентация менен танысты.

Ташкент – Самарқанд жөнелисинде жаңа заманагөй автомагистраль қурыў жойбары көрип шығылды. Режеге бола, бул жолдың улыўма узынлығы 282 километрди қурайды. Соннан 140 километрлик участкаларда топырақты беккемлеў жумыслары әмелге асырылады. Жойбар шеңберинде 12 транспорт шешими, 91 көпир ҳәм 16 жол өткелиниң қурылысы нәзерде тутылған.

Бес жыл даўамында қурылысы режелестирилип атырған бул жол I-a категориялы, яғный автомобиль жолларының ең жоқары техникалық ҳәм қәўипсизлик стандартларына жуўап беретуғын магистраль болады. Онда ҳәр бири 3,75 метр кеңликтеги цемент-бетон қапламалы алты ҳәрекетлениў полосасы қурылады. Жолдың жойбарлаў тезлиги саатына 150 километр етип белгиленеди.

Сондай-ақ, Ташкент-Ангрен-Қамчиқ өткели жөнелисинде 171 километрлик альтернатив автомобиль жолын қурыў жойбары да әмелге асырылады. Бул жолда 33 километрлик туннельлер ҳәм бир қатар ири инженерлик объектлериниң қурылысы режелестирилген.

Мәмлекетимиз басшысына усы ири жойбарлар ушын ислеп шығылып атырған қаржыландырыў дереклери ҳәм сырт ел инвесторларын тартыў бойынша алып барылып атырған сөйлесиўлер ҳаққында мәлимлеме берилди.

Автомагистральларды жойбарластырыўда заманагөй транспорт инженерлиги шешимлеринен пайдаланыў, интеллектуаллық басқарыў ҳәм мониторинг системаларын енгизиў, ҳәрекет қәўипсизлигин тәмийинлеў мәселелерине айрықша итибар қаратыў зәрүрлиги атап өтилди.

Презентацияда Ташкент – Чорвоқ ҳәм Үргенш – Хийўа жолларын қурыў жойбарларының барысы ҳаққында да мағлыўмат берилди.

Сондай-ақ, Ташкенттиң жаңа халықаралық аэропортын қурыў жойбарының тийкарғы параметрлери көрип шығылды. Биринши басқышта 208,4 мың квадрат метрлик жолаўшы терминалы, узынлығы 4 километрден болған еки ушыў-қоныў жолын қурыў режелестирилген. Соның менен бирге, жылына 20 миллион жолаўшыға хызмет көрсетиў, саатына 30 қоныў ҳәм ушыўды тәмийинлейтуғын инфраструктураны жаратыў және 169 ҳаўа кемеси ушын автомобиль турыў орнын шөлкемлестириў нәзерде тутылған.

Ҳәзирги ўақытта болажақ аэропорт аймағында алып барылып атырған жойбарлаў-излеў жумыслары ҳәм келеси басқышлар ҳаққында мәлимлеме берилди.

Президентимиз тәрепинен жуўапкерлерге жойбарларды техникалық ҳәм экономикалық жақтан пуқта таярлаў, қурылыс жумысларын заманагөй стандартлар тийкарында шөлкемлестириў және транспорт инфраструктурасының узақ мүддет турақлы ислеўин тәмийинлеў бойынша тапсырмалар берилди.

ӨзА