Усы жылы 10-11-июнь күнлери Тәжикстан Республикасы Душанбе қаласында БМШ Халықтаныў қорының (ЮНФПА) халықтаныў ҳәм раўажланыў бойынша халықаралық конференция Ҳәрекетлер бағдарламасының («ICPD-1994») 30 жыллығына бағышланған парламент конференциясы болып өтти.

Конференция жумысында Өзбекстан делегациясы қурамында Олий Мажлис Сенатының ағзалары ҳәм Нызамшылық палатасы депутатлары қатнасты.

Мағлыўмат орнын атап өтиў керек, халықтаныў ҳәм раўажланыў бойынша халықаралық конференция 1994-жылы 5-13-сентябрь күнлери Каир қаласында болып өткен еди. Оның жуўмағында қабыл етилген Ҳәрекетлер бағдарламасы шаңарақты режелестириў, репродуктивлик саламатлықты беккемлеў, гендер теңликти, ҳаял-қызлардың ҳуқықлары менен имканиятларын кеңейтиў, турақлы раўажланыўды тәмийинлеў сыяқлы илажларды қамтып алған.

«Суў ресурслары ҳәм жаслар мәплеринде демографиялық турақлылық» атамасындағы илаж Тәжикстан Республикасы парламенти, Халықтаныў ҳәм раўажланыў бойынша Азия парламентлери ағзаларының форумы, ЮНФПАның Душанбедеги офиси тәрепинен шөлкемлестирилди.

Конференция шеңберинде климат өзгериў машқалалары, суў жетиспеўшилигиниң жаслар ҳуқықлары менен имканиятларына тәсири, өсип киятырған әўладты жумыс пенен тәмийинлеў арқалы демографиялық турақлылықты тәмийинлеў, ҳаял-қызларды қоллап-қуўатлаў бойынша тийкарғы ўазыйпалар, парламентлердиң «ICPD-1994» Ҳәрекетлер бағдарламасы ҳәм БМШ Турақлы раўажланыў мақсетлерине ерисиўдеги орны сыяқлы мәселелер додаланды.

Конференцияда Олий Мажлис Сенатының Илим, билимлендириў ҳәм денсаўлықты сақлаў мәселелери комитетиниң баслығы О.Иминов «Жаслар потенциалынан пайдаланыў: мегатрендлерди шешиў ҳәм регионда демографиялық турақлылықты жаратыўда Өзбекстан тәжирийбеси» темасындағы баянаты менен қатнасты.

Конференция жуўмағы бойынша тийисли усыныслар ислеп шығылды.

Қарақалпақстан хабар агентлиги