Өзбекстан Республикасы Олий Мажлиси Сенатының баслығы Танзила Норбоева Қырғызстан Республикасы Жогорку Кенеши Төрағасының орынбасары Нурланбек Азигалиев басшылығындағы делегация менен ушырасты.

Олий Мажлис ҳәм Жогорку Кенеш арасында бирге ислесиў бойынша парламентлераралық комиссияның гезектеги мәжилисинде қатнасыў ушын мәмлекетимизге келген делегация менен ушырасыўда Өзбекстан ҳәм Қырғызстанның бирге ислесиўи беккем тийкарға ийе екени атап өтилди. Улыўма тарийх, мәдений ҳәм руўхый қәдириятларымыздың уқсаслығы еки мәмлекет арасындағы қатнасықларда айрықша әҳмийетке ийе.

Мәмлекет басшыларының сиясий ерк-ықрары себепли бүгинги күнде бирге ислесиўдиң барлық тәреплерин қамтып алған Өзбекстан – Қырғызстан еки тәреплеме байланысларда, соның ишинде, парламентлераралық бирге ислесиў бағдарында да бүгин мисли көрилмеген раўажланыў бақланбақта.

Атап өтилгениндей, парламент ағзаларының жәрдеминде еки мәмлекет аймақлары арасындағы байланыслар жедел раўажланып, буның нәтийжесинде қоспа жойбарлар алға қойылмақта. Соның менен бирге сөйлесиў ўақтында парламентлераралық бирге ислесиў динамикасы, оны келешекте және де жеделлестириў, онда еле иске қосылмаған имканиятлардан пайдаланыў зәрүрлигине итибар қаратылды.

Сенат баслығы Қырғызстан Жогорку Кенеши менен бирге ислесиўди беккемлеў ушын барлық ҳәрекетлерди даўам еттириўге ҳәм өз-ара пайдалы еки тәреплеме қатнасықлардың бар имканиятын максимал дәрежеде арттырыўға айрықша итибар қаратылатуғынын атап өтти.










– Еки мәмлекет парламентлериниң ҳәзирги басқышындағы тийкарғы ўазыйпасы жоқары дәрежедеги еки тәреплеме келисимлерди әмелге асырыўда жәрдем ҳәм қоллап-қуўатлаўды көрип турмыз, – деди Т.Норбоева. – Парламентлеримиз арасындағы бирге ислесиў бойынша Парламентлераралық комиссия өзине билдирилген үмитлерди ақламақта. Парламентлеримиздиң жәрдеми ҳәм комиссияның жумысы менен биз анық нәтийжелерге ерисиўимиз мүмкин, деп ойлайман. Усы көзқарастан комиссияның мәжилиси күн тәртиби тәреплер ушын әҳмийетли болған сиясий, экономикалық, трансшегаралық, регионаллық ҳәм мәдений-гуманитарлық бирге ислесиў мәселелерин қамтып алған.

Өз гезегинде, Нурланбек Азигалиев Қырғызстан ҳәм Өзбекстан арасындағы қатнасықларда кейинги жылларда жедел пәт пенен раўажланып атырған парламентлераралық байланыслар әҳмийетли орын ийелейтуғынын атап өтти.

– Биз бирге ислесиўди буннан былай да кеңейтиўден мәпдармыз, – деди Н.Азигалиев. – Дурыс атап өткениңиздей, өз-ара қатнасықларды тек ғана парламентлер арасында емес, ал комитетлераралықта да беккемлеў зәрүр. Парламентимиздиң қарым-қатнасы тек ғана мәмлекетлеримиз арасындағы кең көлемли қатнасықларды кеңейтиўге емес, ал еки мәмлекеттиң барлық әҳмийетли бағдарларында бирге ислесиўдеги ҳәрекетлерин ҳуқықый жақтан беккемлеў жолында нызамшылықты жетилистириўде әҳмийетли фактор болады.

Ушырасыў жуўмағы бойынша еки тәреплеме ҳәм регионаллық әҳмийетке ийе мәселелер бойынша турақлы түрде бирге ислесиў ҳәм пикир алысыўды даўам еттириўге келисип алынды.

Норгул АБДУРАИМОВА,

ӨзАның хабаршысы