Өзбекстан Республикасы Президентиниң Пәрманы

Өзбекстан Республикасы ҳәм Америка Қурама Штатлары арасында өз-ара пайдалы саўда-инвестициялық ҳәм коммерциялық байланысларды буннан былай да кеңейтиў ҳәм беккемлеў және исбилерменлик орталығын сапа жағынан жақсылаў ҳәм исбилерменлик жумысын қоллап-қуўатлаў, бул бағдарда жумысларды нәтийжели шөлкемлестириў мақсетинде қарар етемен:

1. Өзбекстан Республикасы Президентиниң 2025-жыл 4-6-ноябрь күнлери АҚШқа сапары даўамында “С5+1” саммити шеңберинде Өзбекстан тәрепинен Өзбекстан Республикасы Президенти Администрациясы басшысы ҳәм Америка тәрепи менен келисилген ҳалда АҚШ Президенти ўәкили басшылығында Америка-Өзбекстан исбилерменлик ҳәм инвестиция кеңесин (кейинги орынларда – Кеңес) шөлкемлестириў бойынша келисимге ерисилгенлиги мағлыўмат ушын қабыл етилсин.
2. Өзбекстан Республикасы Президенти Администрациясының басшысына Өзбекстан тәрепинен Кеңестиң қурамын, оның регламентин ҳәм жумыс тәртип-қағыйдаларын тастыйықлаў ўәкиллиги берилсин.
3. Кеңеске көрип шығыў ушын киргизилетуғын төмендеги мәселелерди ислеп шығыў әҳмийетли есапланатуғыны белгиленсин:

(а) стратегиялық бизнес басламалары, ири инвестиция ҳәм саўда жойбарларының ислеп шығылыўы ҳәм келисилиўин муўапықластырыў, сондай-ақ, олардың әмелге асырылыўын турақлы мониторинг етиў;

(б) Өзбекстанға қосымша инвестицияларды тартыў ушын арнаўлы инвестиция фондын жаратыў, ири инвесторлар сыпатында Халықаралық финанслық раўажланыў корпорациясын (DFC) ҳәм Өзбекстан тәрепинен де инвесторларды белгилеў, сондай-ақ, әҳмийетли инфраструктуралық ҳәм стратегиялық жойбарларды қаржыландырыў ҳәм қәўип-қәтерлерди бөлистириў ушын ири финанс институтларын (ЕТРБ, ХМК, АДБ) тартыў;

(в) тариф ставкаларын өз ара төменлетиў мәселелери бойинша сөйлесиўлерди даўам еттириў;

(г) Программалық өнимлер ҳәм мәлимлеме технологиялары технологиялық парки (IТ-парк) резидентлери болған компаниялар өнимлери ҳәм хызметлерин системалы түрде алға сүриў;

(д) мәмлекеттиң инвестициялық портфелин, сониң ишинде, Өзбекстан Республикасы Орайлық банки валюта резервиниң бир бөлегин ҳәм басқа активлерин диверсификациялаў бойынша усыныслар киргизиў.

Сыртқы сиясий ҳәм мәмлекетлик басламаларды муўапықластырыў нәтийжелилигин арттырыў мақсетинде 2026-жыл 1-январьдан Өзбекстанның АҚШтағы елшиханасы структурасына қосымша кеңесгөй-елшилер – Өзбекстан Республикасы Президенти Администрациясының АҚШтағы ўәкили (кейинги орынларда – кеңесгөй-елшилер) лаўазымы киргизилсин. Белгиленсин:

(а) кеңесгөй-елши лаўазымына тайынлаў ҳәм оннан азат етиў, сондай-ақ, жумысының регламентин тастыйықлаў Өзбекстан Республикасы Президенти Администрациясы басшысы тәрепинен әмелге асырылады;

(б) кеңесгөй-елши өз жумысында Өзбекстан Республикасы Президенти Администрациясы басшысына есап береди ҳәм Өзбекстан Республикасының АҚШтағы дипломатиялық ўәкилханасы басшысының жумысын еки тәреплеме қатнасықларды раўажландырыў жағынан қоллап-қуўатлаўға жуўапкер есапланады.

5. Кеңесгөй-елшиниң мойнына төмендеги ўазыйпалар жүкленсин:

(а) Өзбекстан ҳәм АҚШта ири ҳәм стратегиялық инвестиция ҳәм саўда жойбарларын әмелге асырыў мәселелери бойынша тиккелей баслама көрсетиў ҳәм додалаў;

(б) Өзбекстан тәрепинен Кеңестиң жумысын комплексли муўапықластырыў.

6. Инвестициялық-саўда блогын беккемлеў ҳәм исбилерменлик бирге ислесиўин кеңейтиў, Кеңестиң мәселелери ҳәм жойбарларын табыслы әмелге асырыў, сондай-ақ, кеңесгөй-елшиниң жумысына жәрдемлесиў мақсетинде Өзбекстан Республикасы Сыртқы ислер министрлиги:

(а) Өзбекстан Республикасы Инвестициялар, санаат ҳәм саўда министрлиги менен биргеликте үш ҳәпте мүддетте Өзбекстан Республикасының АҚШтағы елшиханасы хызметкерлериниң штат бирлигин көбейтиў ҳаққында усыныс киргизсин;

(б) бир ай мүддетте АҚШ аймағында қосымша консуллықлар ашыў мәселесин ислеп шықсын, бунда географиялық қамтып алыўды тәмийинлеў ушын контингентке АҚШ тармақларының тийкарғы хаблары менен ислейтуғын хызметкерлер ҳәм қәнигелерди киргизсин ҳәм де ўатанласлар үлкен диаспоралары ең көп топланған аймақларды (Филадельфия, Чикаго, Орландо ҳәм Сиэтл қалалары) есапқа алсын.

АҚШтың барлық штатларында жасап атырған өзбек диаспоралары менен нәтийжели бирге ислесиў моделин ислеп шығыў ҳәм табыслы әмелге асырыў – АҚШ аймағында жаңадан шөлкемлестирилип атырған консуллықлардың тийкарғы ўазыйпаларынан бири етип белгиленсин.

8. 2026-жыл 1-январьдан баслап сырт ел кәрханаларының устав фондын қәлиплестириў (ямаса капиталда қатнасыў) ушын АҚШтағы инвестициялық жумысы бойынша резидентлердиң операциялары – Өзбекстан Республикасындағы банклерде резидентлердиң есап бетлеринен пул қаржыларын өткериў, АҚШтағы филиалларын айланыс қаржылар менен толықтырыў шеклеўлерсиз, резидентлердиң есап бетлериндеги қаржылар шеңберинде әмелге асырылатуғыны белгиленсин.

Өзбекстан Республикасы Орайлық банки бир ай мүддетте нызамшылық ҳүжжетлерине усы бәнттиң талапларынан келип шығатуғын өзгерислер киргизсин.

Экономика ҳәм қаржы министрлиги Орайлық банк пенен биргеликте дәраматты арттырыў мақсетинде Кеңеске ең пайдалы ҳәм жоқары ликвидли, соның ишинде, АҚШта жайласқан активлерге бағдарлаў ушын мәмлекеттиң инвестициялық активлери ҳәм валюта резервлери структурасын жетилистириў бойынша усыныслар киргизсин.

10. Инвестициялар, санаат ҳәм саўда министрлиги Өзбекстан Республикасы Сыртқы ислер министрлиги менен биргеликте:

а) еки ҳәпте мүддетте Америка тәрепи менен биргеликте турақлы офиси АҚШта болған Кеңестиң атқарыў уйымы хызметкерлериниң турақлы штатын, соның ишинде АҚШ қәнигелеринен ибарат қурамда қәлиплестириў мәселесин үйренип шықсын;

(б) жигирма күн мүддетте Өзбекстан тәрепинен Кеңестиң регламентин ҳәм жумыс тәртип-қағыйдаларын тастыйықлаў ушын киргизсин;

(в) бир ай мүддетте:

(i) Өзбекстан тәрепинен Кеңес қурамын, соның ишинде, оған Америка исбилерменлик ҳәм инвестиция жәмийетшилигиниң абырайлы ўәкиллерин тартқан ҳалда тастыйықлаўға киргизсин;

(ii) Америка тәрепи менен Инвестицияларды өз-ара қоллап-қуўатлаў ҳәм қорғаў ҳаққындағы келисим бойынша сөйлесиўлерди басласын.

Өзбекистан Республикасы Сыртқы ислер министрлиги мәпдар министрликлер ҳәм уйымлар менен биргеликте бир ай мүддетте нызамшылық ҳүжжетлерине усы Пәрманнан келип шығатуғын өзгерислер ҳәм қосымшалар ҳаққында усыныслар киргизсин.

12. Усы Пәрманның орынланыўын қадағалаў Өзбекстан Республикасы Президенти Администрациясының басшысы С.Ш. Мирзиёеваға жүкленсин.

Өзбекстан Республикасы Президенти

Ш. Мирзиёев