Өзбекстан Республикасы Президенти Шавкат Мирзиёев 15-октябрь күни Саудия Арабстанының жетекши компанияларының басшыларынан ибарат абырайлы делегация басшылығында елимизге келген Саудия Арабстаны Патшалығының инвестициялар министри Холид ал-Фалиҳти қабыллады.

Ушырасыў алдынан жоқары мәртебели мийман мәмлекетимиз басшысына Саудия Арабстаны Патшасы Салмон бин Абдулазиз Ол Сауд ҳәм Мийрасхор, Бас министр Муҳаммад бин Салмон Ол Саудтың сәлеми ҳәм ең жақсы тилеклерин жеткерди.

Жоқары дәрежедеги келисимлерди әмелге асырыў шеңберинде Өзбекстан-Саудия көп қырлы бирге ислесиўин ҳәм кең көлемли шерикликти буннан былай да кеңейтиўдиң әҳмийетли мәселелери көрип шығылды.

Нәтийжели бирге ислесиў жедел раўажланып атырғаны үлкен қанаатланыўшылық пенен атап өтилди. Барлық дәрежедеги байланыслар жеделлести. Өз-ара саўда көлеми, тиккелей инвестициялар ҳәм биргеликтеги кәрханалардың саны артып бармақта. Еки мәмлекет арасындағы авиақатнаўлар көбейди.

Биргеликтеги жойбарлар портфели 27 миллиард долларға жетти. “ACWA Power” компаниясы менен энергетика тараўында 15 миллиард долларлық бир қатар ири жойбарлар әмелге асырылмақта.

Күни кеше Ташкент қаласында өткен Ҳүкиметлераралық комиссия ҳәм Исбилерменлер кеңесиниң гезектеги мәжилислериниң пайдалы нәтийжелери, олар шеңберинде жаңа келисим ҳәм шәртнамаларға қол қойылғаны жоқары баҳаланды.

“Жасыл” энергетика, аўыл хожалығы, электротехника, көшпес мүлк, мәмлекетимиз аймақларында инфраструктураны модернизациялаў ҳәм басқа да тийкарғы бағдарлардағы жойбар ҳәм басламаларды қысқа ўақыт ишинде әмелге асырыўға айрықша итибар қаратылды.

ӨзА