Prezident Shavkat Mirziyoev xalıqtıń bántligin támiyinlew hám kásiplik bilimlendiriw sistemasındaǵı jańa qatnaslarǵa baylanıslı prezentaciya menen tanıstı.

Usı jılı bul tarawda sırt el tájiriybesi tiykarında jańa qatnaslar jolǵa qoyıldı. Bankler máhálleler menen baylanısıp, xalıqtıń bántligin támiyinlewge de úles qospaqta. Atap aytqanda, birinshi yarım jıllıqta 3 millionnan aslam xalıq dáramatlı miynetke tartıldı.

Kámbaǵallıqtı qısqartıw boyınsha jaratılǵan sistema hám jumsalıp atırǵan qarjılar óz nátiyjesin berip, usı jıldıń 1-iyul jaǵdayına bola, kámbaǵallıq dárejesi 6,8 procentti quradı.

Xalıqtıń bántligin arttırıwda kásiplik bilimlendiriwdiń sapası júdá áhmiyetli. Bul baǵdarda jumıs beriwshiler menen birge islesiwdi keńeytiw, mamanlıq arttırıwdı jańa dárejege kóteriw hám jeke menshik sektordıń qatnasın támiyinlew talap etilmekte. Kásiplik bilimlendiriwdiń miynet bazarınıń talaplarına sáykes kelmewi kadrlar tayarlawda belgili bir mashqalalarǵa sebep bolmaqta.

Miynet qatnasıqlarındaǵı ayırım normalar isbilermenlik subektleri, ásirese, kishi kárxanalar ushın qıyınshılıq tuwdırmaqta. Jumısqa qabıl etiwde málimleme texnologiyalarınıń imkaniyatlarınan tolıq paydalanılmay atır.

Sonday-aq, ámeldegi talaplar jumıs beriwshilerdi haqıyqıy vakansiyalardı ashıq járiyalawǵa xoshametlemeydi. Aqıbetinde bul maǵlıwmatlardı jasırıwǵa alıp kelip, miynet bazarın durıs tallaw hám kásiplik bilimlendiriw baǵdarların anıqlaw imkaniyatın sheklemekte.

Prezentaciyada usı mashqalalardı sheshiwge qaratılǵan jańa reje hám baslamalar haqqında maǵlıwmat berildi.

Oǵan muwapıq, miynet uyımları jumıs beriwshilerge jaza qollanıwshı emes, al sherik sıpatında jumıs alıp baratuǵın, olarǵa xızmet kórsetetuǵın strukturaǵa aylanıwı názerde tutılmaqta.

Atap aytqanda, jumıs beriwshiler tárepinen bos jumıs orınları haqqındaǵı májbúriy maǵlıwmatlardı usınbaǵanı hám jiberilgen talabanlardı jumısqa almaytuǵını ushın jaza ilajların biykarlaw usınıs etilmekte.

Bul arqalı bántlik uyımları jumıs beriwshilerden durıs hám haqıyqıy maǵlıwmatlardı toplap, olarǵa jumıs izlep atırǵan puqaralardı baǵdarlaydı. Jumıs beriwshi bolsa talabandı qabıllaw yamasa qabıl etpewdi ózi sheshedi.

Bul sistemanı engiziw ushın arnawlı elektron platforma jaratılıp, dáslep Tashkent qalasında tájiriybe tárizinde baslanadı hám keyin ala pútkil mámleket boylap engiziledi.

Sonıń menen birge, qánige tabıw qıyın bolǵan vakansiyalar kásiplik bilimlendiriwdiń tiykarǵı baǵdarlarına aylandırılıp, tayarlıq processlerin maqsetli shólkemlestiriwge xızmet etedi.

Kásiplik bilimlendiriwdiń sapasın bunnan bılay da arttırıw maqsetinde jeke menshik sektor wákillerin Kásiplik kónlikpeler oraylarınıń jumısına tartıw, ayırım oraylardı bolsa anıq tarawlar boyınsha qánigelestirilgen bilimlendiriw oraylarına aylandırıw rejelestirilgen.

Juwapkerlerge kásiplik bilimlendiriwdi úsh basqıshlı sistemaǵa ótkeriw wazıypası qoyıldı. Sonıń ishinde, internet arqalı biypul videosabaqlardı engiziw, isleytuǵın puqaralarǵa qayta tayarlıq yamasa qánigeligin arttırıw ushın “kásiplik vaucher” arqalı imkaniyat jaratıw boyınsha kórsetpeler berildi.

Mámleketimiz basshısı maman kadrlardı tayarlaw respublikada jumıssızlıq hám kámbaǵallıqtı qısqartıwǵa xızmet etetuǵın eń áhmiyetli faktorlardan biri ekenin atap ótti.

ÓzA