Ózbekstan Respublikası Prezidenti Shavkat Mirziyoev Franciya Respublikası Prezidenti Еmmanuel Makronnıń mirat etiwine bola mámleketlik sapar menen Parij qalasına keldi.

Samolyot aldında Ózbekstan jetekshisin Franciya milliy bilimlendiriw, joqarı bilimlendiriw hám ilimiy izertlewler ministri Еlizabet Born, Parij áskeriy okrugi sárkardası general Loik Mizon hám basqa rásmiy shasxlar kútip aldı.
«Orli» xalıqaralıq aeroportında joqarı mártebeli miyman húrmetine eki mámleket bayraqları kóterildi, húrmetli qarawıl sap tarttı.
Mámleketimiz delegaciyası jaylasqan rezidenciya aldında Franciyada oqıp, islep atırǵan hám ilimiy izleniwler alıp barıp atırǵan bir topar watanlaslarımız Prezident Shavkat Mirziyoevti úlken quwanısh penen kútip aldı. Mámleketimiz basshısı olar menen qızǵın sáwbetlesti, oqıw hám izleniwlerine tabıs tiledi.
Sapardıń tiykarǵı ilajları búgin, 12-mart kúnine mólsherlengen.
Baǵdarlamaǵa muwapıq, Elisey sarayında joqarı dárejedegi Ózbekstan-Franciya sóylesiwleri bolıp ótedi.
Sonday-aq, mámleketimiz basshısı YuNESKO bas direktorı Odri Azule menen ushırasıw hám Franciyanıń jetekshi kompaniya hám bankleriniń wákilleri menen dógerek sáwbetin ótkeredi.

ÓzA