Búgingi kúnde elimizde keń túrde dawam ettirilip atırǵan «Jasıl mákan» ulıwma milliy joybarı sheńberinde Xalıqaralıq áhmiyetke iye A-380 avtomobil jolı boyın kókilemzarlastırıw maqsetinde seksewil, sayamanlı terekler, shor hám qurǵaqshılıqqa shıdamlı eginlerdiń tuqımların egiw jumısları alıp barılmaqta.

Bul ilajlar Aralboyı regionında shólleniwge qarsı gúresiw, samal eroziyasın azaytıw, topıraqtı bekkemlew hám ekologiyalıq jaǵdaydı jaqsılawǵa qaratılǵan bolıp, Aralboyı innovaciya orayı, Ekologiya hám ıqlım ózgeriwi milliy komiteti menen birge ilimiy jantasqan halda ámelge asırılmaqta.
Sonı da ayrıqsha atap ótiw kerek, sońǵı jılları elimizde húrmetli Prezidentimizdiń basshılıǵında jasıl aymaqlardı keńeytiw hám ekologiyalıq jaǵdaydı jaqsılawǵa ayrıqsha itibar qaratılıp, ótken jıllar dawamında Aral teńiziniń qurıǵan maydanlarında «Jasıl qaplamalar» jaratıw maqsetinde derlik 2 million gektar maydanǵa seksewil hám basqa da shólge shıdamlı ósimlikler egildi.
Bunday iygilikli isler búgingi kúnde de qızǵın dawam ettirilip, teńizdiń qurıǵan maydanlarında sonday-aq, avtomobil jolları boylarınıń qumlı hám shól aymaqlarında shólge shıdamlı ósimliklerdi egiw jumısları alıp barılmaqta.

Qaraqalpaqstan xabar agentligi