Ózbekstan Respublikasınıń Oliy Majlisi Senatına Latviya Respublikası Joqarı audit uyımınıń basshısı Edgars Kochagins keldi.

Senat baslıǵı Tanzila Norboeva menen ushırasıwda mámleketlik audit tarawındaǵı eki tárepleme birge islesiwdi jáne de keńeytiw, zamanagóy audit kózqarasların engiziw hám málimlemege tiykarlanǵan basqarıw ámeliyatın rawajlandırıw máseleleri dodalandı.
Ózbekstan Esap palatası hám Latviya Joqarı audit uyımı arasında qol qoyılǵan birge islesiw kelisiminiń ámeliy nátiyje berip atırǵanı, sonıń ishinde, birgeliktegi oqıw ilajları hám tájiriybe almasıw jedelleskeni atap ótildi.
Latviyada mámleketlik audit xızmeti hám Ózbekstan Esap palatası parlament penen tıǵız birge islesiwde isleytuǵını, turaqlı esabatlar usınatuǵını hám tiyisli komitetlerdiń májilislerinde qatnasatuǵını atap ótildi.
E.Kochagins Latviyada tiykarǵı itibar nátiyjelilik hám muwapıqlıq auditlerine qaratılǵanı hám turaqlı basqarıw sisteması sebepli finanslıq auditlerge zárúrlik azayǵanın aytıp ótti. Mámleketlik audit usınıslarınan byudjet procesinde paydalanıw ámeliyatı, hár jılı byudjet dáramatların arttırıw yamasa qárejetlerdi qısqartıwǵa xızmet etetuǵın usınıslar boyınsha arnawlı maǵlıwmat tayarlanıwı hám onıń húkimet hám parlament tárepinen qararlar qabıl etiwde qollanılıwı atap ótildi.
Latviya tárepi Ózbekstanda strategiyalıq basqarıw, monitoring hám bahalaw sistemaların jetilistiriw boyınsha ámelge asırılıp atırǵan reformalardı joqarı bahaladı. Data-based governance principlerine ótiw mámleketlik basqarıw nátiyjeliligin arttırıwda áhmiyetli qádem ekeni atap ótildi.
Mámleketlik baǵdarlamalardıń nátiyjelerin tallaw hám málimleme sistemaların integraciyalaw máseleleri boyınsha birge islesiw perspektivaları dodalandı.
Nátiyjelilik auditi, qáwip-qáterlerdi bahalaw hám ishki auditorlar menen birge islesiw ámeliyatı boyınsha óz-ara tájiriybe almasıwǵa kelisip alındı.

N.Abduraimova, ÓzA