Rossiya sırtqı isler ministri Sergey Lavrov AQShqa múrájat jollap, Vladimir Putin hám Donald Tramp arasındaǵı sammitke tayarlıqtı qayta tiklew usınısın bildirdi. Bul haqqında lawazımlı shaxs RF ǵalaba xabar quralları arqalı málim etti.

Oktyabr ayınıń aqırında Budapeshtte shólkemlestiriliwi rejelestirilgen bul ushırasıw Kreml Ukrainaǵa qarsı áskeriy háreketti toqtatpaǵanı sebepli ámelge aspaǵan. Urıstı tamamlawǵa isenimli bel baylaǵan Tramp Rossiya qoyǵan talaptan túńilip, nátiyjesiz sóylesiwden usı tárizde waz keshti. Usınday jaǵdayda Lavrov kútilmegen pikir menen shıqtı:
– Moskvada amerikalı kásiplesler menen sammitke tayarlıq procesin qayta baslaw máselesin dodalawǵa tayarmız!
Onıń sózlerine bola, “Eger AQSh wákilleri de óz usınısın jańalasa, ushırasıw ushın Budapesht qolaylı orın bolıp qala beredi. Tilekke qarsı, tájiriybeli siyasatshı “usınıstı jańalaw” degende neni názerde tutqanına túsinik bermegen.
Bizge belgili, Lavrov AQSh mámleketlik xatkeri Marko Rubio menen sońǵı márte 20-oktyabrde sóylesken. Sol waqıtta diplomatlar telefon arqalı Budapesht sammitine tayarlıq temasın kótergen. Bunnan keyin AQSh mámleketlik xatkeri Trampqa ushırasıwdı biykarlaw usınısın bergen hám bunıń izinen RFǵa qarsı keń kólemli sankciya engizildi.
Rossiya sırtqı siyasat uyımı basshısınıń pikirinshe, “sol waqıtta sammit ne ushın biykarlanǵanı elege shekem túsiniksiz”. Qızıq, Lavrovtıń “túsinbewi” diplomatiyalıq oyın ba yamasa sadalıq pa?

Kenja Bekjonov, Anvarxwja Ahmedov, ÓzAnıń xabarshıları