Prezident Shavkat Mirziyoevtiń basshılıǵında jasalma intellekt texnologiyaların rawajlandırıw boyınsha videoselektor májilisi bolıp ótti.

– Biz 2030-jılǵa barıp, jasalma intellekt boyınsha “TOP-50” mámleket qatarına kiriwdi maqset etkenbiz. Sonıń ushın, aldıńǵı sırt el tájiriybesinen kelip shıǵıp, “Jasalma intellekt alyansı”n shólkemlestiremiz, – dep atap ótti Prezidentimiz.
Bul alyans quramına tarawda nátiyjeli jumıs alıp barıp atırǵan jetekshi kompaniyalar, sırt elli ekspertler hám watanlaslarımız, iri mámleketlik kárxanalar, bankler hám joqarı oqıw orınları kirgiziledi.
Alyanstıń tiykarǵı wazıypaları jetekshi xalıqaralıq ilimiy-izertlew orayları hám akseleratorlar menen birge islesiwdi kúsheytiw, ózimizdegi baǵdarlamalar boyınsha media-kontentti jaratıp, xalıqaralıq PR kampaniyalardı shólkemlestiriw, jergilikli kárxanalar hám qánigelerdiń xalıqaralıq kórgizbe, forum hám konferenciyalarda qatnasıwın shólkemlestiriwden ibarat boladı.
Májiliste aymaq hám tarmaqlardıń basshıları esabat berdi, tarawdaǵı startaplardıń tiykarın salıwshıları hám informatika muǵallimleriniń pikirleri tıńlandı.

ÓzA